Udubo lokwabela izakhamizi amanzi amalutshwana luqhubekela phambili edolobheni lakoBulawayo.
Izakhamizi zithi zithwele nzima ngokugavunwa kwamanzi. Ukugavunwa kwamanzi okwamalanga amathathu ngeviki yikhansili yedolobho lakoBulawayo sekutshiye izakhamizi zingazi ukuba ziyophuma nini kuloludubo.
Lokhu kwenzakala izulu lingananga ngemfanelo okubangele ukuba amadamu lapho okukhiwa khona amanzi angabi lamanzi eneleyo.
Esinye isakhamuzi sako Bulawayo, uNkosikazi Agnes Ndlovu, uthi banengi abantu ababhekane lodubo lwamanzi.
“Indaba yokusilela kwamanzi ezindlini lapha ludubo lwabantu abanengi kodwa lokhu sekusitshiye siphila nzima noba sesihlala lengcekeza ezindlini njalo kulakho ukubanela ingcekeza sicela ikhansili izame ukusitholisa amanzi.'’
UNkosazana Solani Mangena laye ukhala ngokusilela kwamanzi ethi kubaphilisa nzima.
“Sibhekane lodubo lwamanzi lapha ngoba ayaphela amalanga phose amathathu njalo ngezinye izikhathi ayaphela empompini singaziswanga. Udubo lwamanzi lubuhlungu asazi ukuthi luyaphela nini.”
Isikhulumeli sekhansili yako Bulawayo, uNkosikazi Nesisa Mpofu, uthi baphakathi kokulungisa impompi zamanzi ezibangele ukuba bagavunele uzulu amanzi.
“Amanzi edolobheni ayasilela kodwa akusoke kuhlale kunjalo ngoba amadamu ethu alamanzi edlula ingxenye yekhulu. Sibelohlupho lempompi lemitshina edonsa amanzi sikhulumanje kulabantu abaphakathi kokulungisa njalo impahla ezifunekayo lazo sisanda kuzithola phandle kwelizwe ngakho abalungisayo baphakathi kokulungisa impompi lemitshina yokutholisa abantu amanzi.”
Inengi lezakhamizi likha amanzi ezikotshweni eziduze lamakhaya.
