Ikhansili yedolobho lakoBulawayo imanyene lenhlanganiso yeUrban Councils’ Association of Zimbabwe iqhuba umhlangano wesithathu wamakhansili obona ngokutshalwa kwemali obizwa ngokuthi Local Governemnt Investment Conference (LOGIC).
Umhlangano lo, oqhutshwa ngaphansi kwesikhoko esithi ‘Local Authorities: Ready for Investment’, wenziwa ngesikhathi kulombukiso wamakhansili enkundleni yeZimbabwe International Trade Fair.
UMongameli weUrban Councils’ Association of Zimbabwe, uMayor wakoBulawayo uKhansila Solomon Muni ,uvule lumhlangano wemukela bonke abangene lumhlangano esithi njengamakhansili balangazelela intuthuko enkulu elizweni njalo uhlelo lukaMongameli Emmerson Mnangagwa lokuthi ilizwe livulekile kwabafuna ukuqala amabhizimusi bayalusekela.
“Kuyasijabulisa lathi kakhulu ukuba lomcimbi ongaka, kusinika ithuba njengedolobho lokuthi lapho esisilela khona ekusebenzeni kwethu sithole amathuba okukhulumisana lamankampani abukisayo labatshali bemali endabeni zamanzi, ukubutha izibi lokunye okutshiyeneyo.”
Umabhalane weKhansili yeHwange, uMnu. Ndumiso Mdlalose, uthe baphakathi kokudinga abatshali bemali lobanje sebeqalile ukwakha amawofisi ekhansili.
“Siphakathi kokudinga abatshali bemali kodwa silenhlelo ezithile esesiziqalile ezokuthuthukisa iHwange. Sesiqalile ukwakha amawofisi amatsha ekhansili, yithi ezweni kumakhansili esesiqalile ukwakha imitshina yokugaya amandla egesti ngelanga kunye levinkili lamabhizimusi lokunye okuthile.”
UMabhalane wekhansili yeLupane, uMnu. Chalton Moyo, uthi labo belenhlelo ezimbalwa ezokuthuthukisa indawo le.
“Idolobho leLupane liphakathi kokwaka izindlu, imigwaqo lamawofisi ekhansili kanye lokutholisa abahlali bedolobho amanzi kuhlanganisa lekolitshi leLupane State University. Siyanxusa njalo abatshali bemali ukuba baze eLupane bezobona amabhizimusi abangawaqala alenzuzo.”
Isikhulumeli sekhansili yeVictoria Falls, uMnu. Ngqabutho Moyo, uthi balenhlelo zentuthuko ezimbalwa njalo labatshali bemali bangeza bezotshala imali okulenzuzo.
“Edolobheni leVictoria Falls silenhlelo ezimbalwa njalo okwamanje siphakathi kokutholisa uzulu amanzi ahlanzekileyo, siyakha ivinkili elikhulu lamabhizimusi kanye lenkundla yemidlalo ehlukeneyo emizameni yokutholisa izethekeli zethu ukwethekela okupheleleyo.”
Omunye wabatshali bemali osuka eUnited Kingdom, owenkampani yeZimbabwe Capital Connect, uMnu. Maurice Dillion, uthi eleZimbabwe lilakho ukuvuka kwezomnotho uma lingalandela indlela eziqondileyo zokwenza amabhizimisi.
Umhlangano weLOGIC ukhangelele ukuvulwa okusemthethweni ngoLwesithathu nguMsekeli kamphathintambo wombuso wezabelo, uNkosikazi Jennifer Mhlanga.
IZimbabwe iphakathi kohlelo lokuzama ukuvuselela ezomnotho welizwe ngaphansi kohlelo oluqhutshwa nguMnangagwa lokuthi ilizwe livulekile kulabo abafuna ukutshala imali lokuqala amabhizimusi.
