Abazali abalabantwana abaye ezikolo bakhonona ngentengo yezigqoko zezikolo lokunye osokukhuphuke okumangalisayo.
Bathi kabasoze benelise ukuthenga ukufuneka ezikolo ngenxa yokuswela imali.
Omunye babakhalayo nguNkosikazi Thokozile Sibanda.
“Thina njengabazali sithwele nzima ngoba konke okufuneka esikolo kukhuphuke intengo okumangalisayo. Ama uniform akhwela maviki wonke. Okokubhalela asikhulumi ngakho ngoba kuyethusa. Sesithenga phandle kulabo abawoda kobo Botswana. Kungcono lisincede sibili ngoba sithwele nzima ukuthi abantwana bayafunda ngani bebhalela ngaphi …”
Lokhu kusekelwe nguNkosikazi Linda Mafu labanye abantu abathi baphelelwe ngumphako ngoba kabala mali yokufundisa abantwana.
Unkosikazi Samukele Tshuma olamawele aya kuForm 1, walotshelwa iphetshana ngabathengisa ezitolo okumele akuthengele abantwana besikolo.
“Umntwana oyedwa yi$300. Sengiza phombukwenza ngoba kumele ukuthi abantwana baye esikolo. Akulanto engingayenza. Lapha besesicela ukuthi uhulumende angangenela.”
Ukukhuphuka kwentengo yempahla kukhathaza umzali wonke e Zimbabwe ngoba abanengi iholo alengezelelwanga kodwa intengo ikhuphuka malanga wonke. Lokhu kubenza bacine bengasazi ukuthi abantwana bazafunda njani.
Izembatho zenkazana eqalisa izifundo zeForm One zibiza ikhulu lamatshumi amahlanu ($135) amadola kuthi isikhwama sengwalo sibiza itshumi lamadola.
