Uqhubekela phambili umcintiswano wokucecisa izindlu osungulwe kunsukwane ezisanda kwedlula yinhlanganiso ekhangelane lokuvuselela amasiko esintu eyeAmagugu International Heritage Center.
UMqondisi wenhlanganiso le, Umnu. Phathisa Nyathi, uthi baqhuba umcintiswano lo oweComba Indlu Ngobuciko ukwenzela ukuvuselela isiko lokucecisa izindlu kusetshenziswa udaka.
UNyathi uthi isiko leli likhanya selinyamalala kuzulu ngakho-ke bakubone kuqakathekile ukuthi babambisane lekholitshi leNational University of Science and Technology, iArt Gallery koBulawayo lamankampani amanengi ukwenzela ukugcina isiko leli.
UNyathi uthi umcintiswano lo oqaliswe eMatobo, esabelweni seMatabeleland South, ukhangelelwe ukuthi uzakwenziwa ilizwe lonke ngesikhathi esilandelayo.
Uthi kuzabe kulomunye umbukiso ngenyanga ezayo owabesifazane owokuzicomba ebusweni.
UNyathi uthi konke lokhu kwenzelwa ukuvuselela amasiko esintwini asetshabalala.