Abesifazana abakumsebenzi wokwemba amatshe aligugu eZimbabwe bamukele ngenjabulo uhlelo lukahulumende olumenyezelwe kuMonetary Policy ngeviki edluleyo, olweCadastra Software, lokusebenzisa ubulembu ekubhaliseni indawo zabo zemigodi bahle bephiwe invumo yokwemba.
Bathi lokhu kuzaqeda ubuqili lemisebenzi yenkohlakalo ekutholisweni umgodi wamatshe aligugu.
Lokhu kwethulwe emhlanganweni wokwemba amatshe aligugu weMining for Sustainable Development oqoqwe yinhlanganiso elwisana lemisebenzi yenkohlakalo elizweni, eyeTransparency International Zimbabwe, koBulawayo ngoLwesithathu.
Abesifazana abakumsebenzi wokwemba bathe uhlelo lweCadastra Software luzanceda ngempela.
UNkosikazi Nomuhle Ncube, olomgodi wegolide eNyathi ngaphansi kweBubi Small Scale Miners Asssociation, uthi uhlelo lolu lungalandelwa ngokuchasisa kukahulumende lulakho ukuqeda inkohlakalo kwezokwemba amatshe aligugu.
Umqondisi kugatsha lukahulumende lwezokwemba amatshe aligugu eMatabeleland North, uMnu Farayi Ngulube, uthe bazaqhuba uhlelo lweCadastra Software.
“Uhlelo lweCadastra sizaluqhubela emawofisini ethu lapho umembi azayenelisa ukubhalisa ebulenjini ngendawo yakhe yokwemba ukuze singabi lokuxokozela ngokuthi umnini wendawo ngubani.”
UMnu. Mzilethi Dube, okumsebenzi wokwemba, uthi uhlelo lolu lulobuhle lobubi balo.
“Uhlelo lolu luhle njalo lubi ngoba kulakho njalo ukuthi kubelobuqili ekubhaliseni uthole ukuthi loba ubhalise ebulenjini abekhona osesithi indawo ngeyakhe ngoba lelilizwe ligcwele amaqili.”
UMnu. Dosman Mangisi, okunhlanganiso yeZimbabwe Federation of Miners, uthi uhlelo lweCadastra luzanceda abantu abanengi.
“Uhlelo leCadastra lulakho ukuletha ubulula lokusebenza kuhle kwezamabhizimusi okwemba amatshe aligugu njalo kuzaqeda ukuba labanini abahlukeneyo kumgodi munye obesekulethe ukuxokozela kwezokwemba ezweni njalo amanye amazwe asevele elusebenzisa loluhlelo lwebulenjini.”
UNkosikazi Jane Lusinga okubhizimusi lokwemba eBubi uthi uhlelo lolu luzabanceda kakhulu.
Ilunga ledale lephalamende elikukhomithi yezokwemba amatshe aligugu elingene lumhlangano, uNkosikazi Jasmine Toffa, uvumelane labesifazana abakubhizimusi lokwemba ethi uhlelo lweCadastra luqakathekile ekuqedeni inkohlakalo kugatsha lwezokwemba.
“Uhlelo lweCadastra luhlelo oluzaletha ukwenza ibhizimusi kubelula njalo ngiyethemba bazaluthakazelela oMama abakubhizimusi yokwemba ngoba ukuze uluqede akuthathi imizuzo edlula ingxenye yehola.”
Ilizwe leZimbabwe linothe kakhulu ngamatshe aligugu emihlobo eyehlukeneyo adlula phose amatshumi amane njalo kuminyaka edluleyo bekungelula ukuba abesifazana bangene kulelibhizimusi.
Abenelisa ukungena bebebhekana lenkinga ezinengi ezigoqela ukuthathelwa imigodi yabo ngabanye abesilisa ngoba kungelandlela elula yokubhalisa indawo yokwemba kodwa uhlelo lweCadastra lubikwa lulakho ukuqeda ukuthathelana okukhona kwendawo zokwemba amatshe aligugu.
