Kuhlelo lwamasiko lokuphila kwabantu nsukuzonke sihlaziya udaba lokusokwa kwabantwana kulandela umbiko othi kulomfanyana wesikolo seSt. Johns Primary eBuhera osesibhedlela kulandela ukusokwa kwakhe ngoNhlangula lonyaka.
Umalume womfana lo, uMnu. Elijah Chiruka, uthi ijaha leli ekade seliphela umoyo ngeNsonto lingeniswe esibhedlela seParirenyatwa lamuhla.
UChiruka uthi isibhedlela lesi sicele ukuthi babhadale amakhulu amabili lamatshumi amahlanu amadollar - $250 ukwenzela ukuthi lumfana ahlinzwe lapho azwa khona ubuhlungu obumangalisayo.
Uthi lumfana ulesilonda esibhibhidla ubomvu esesihlolisiswa ngodokotela. Lumfana wasokwa eMurambinda Hospital kuhlelo lokusokwa ezibhedlela olwaqalisa eZimbabwe ngomnyaka ka2009.
Isenzakalo lesi sibuya ngesikhathi idale lephalamende lihlafuna udaba lokusoka abantwana.
Omele iMatobo kudale leSenate, UNkosikazi Sithembile Mlotshwa, uthi kumele kumiswe ukusoka abantwana njengoba isisekelo sombuso welizwe sibapha ilungelo lokwenza abakufunayo ngemizimba yabo.
Ukuze sihlolisise udaba lokulimala kwabantwana nxa besokwa, akesizwe uNkosikazi Sherley Kapuyanyika Matundu loDokotela onguLieutenant Colonel kubutho lamasotsha, uIsrael Dube, bexoxa loGibbs Dube weStudio 7.
