Kuhlelo lwamasiko lenhlalakahle kazulu, ngoLwesibili sixoxe ngokucola umalukazana.
Longumkhuba owenzelwa ukubika isisu kumbe ukuvalelisa intombi esisiya emendweni.
Nxa intombi izithwele okungekho emthethweni kuyaphendlwa indlela yokukhulumisana labazali bejaha elimnike umthwalo lo.
Kuphuma abesifazane ababili lontombazana lo bayebika isisu. Kujayele ukuthi kutshukwanwe edabeni lolu kuthi-ke ekuseni kubulawe imbuzi nxa isisu sesivunyiwe ngabakibo kajaha.
Labo ababike isisu leso baphiwa inyama yembuzi lenyongo yayo ukwenzela ukutshengisa abakibo kantombi ukuthi umthwalo usuvunyiwe.
Kukhona njalo ukucola intombi esifuna ukuyakwenda okumele yenzelwe idili lapho uzulu adla khona inyama kugidwe njalo kwenziwe imikhuba etshiyeneyo.
Ukuhlaziya ukucolwa kwentombi esisiyakwenda iStudio 7 ixoxe logogo Concilia Mlalazi.
Uthe izolo “sazivalelisa siphiwe izitsha lezinye izipho ezitshiyeneyo.
“Asithi loba akuyenziwanga umtshado opheleleyo kodwa kwenziwe umtshado wokuthi intombi le iyacolwa omncinyane wonalowo olezihlobo esingekho nengi kakhulu kwakukhulunywa ukuthi inkazana le iyacolwa lamuhla iyaphuma lapha ekhaya.”
Uthe nxa kucolwa kwakubulawa inkomo kumbe imbuzi zibe mbili kuthi-ke okwangaphakathi kungadliwa kuphiwe ubabakazi kumbe ugogo walapha ekhaya okwakuphekwa kungafika isikhathi sakhona kuthiwa ngumtshisa nyongo.
Ugogo Mlalazi uthe abanye abantu eZimbabwe basakulandela lokhu loba nje kulemitshado yakulezi insuku.
“Kulesikhathi sokuthi umntwana kuyahlalwa laye phansi alaywe, acolwe athelwe inyongo yakwabo kukhulumelwe kwabakibo abaphansi ukuthi umntwana lo usekhulile usesiya emzini wakobani uyedinga ubuhlobo yikho lapho azabe ehlala khona.”
Uthe umuntu ubecolwa kabili – ngakibo nxa esephuma ayecolwa njalo lapho ayakhona.
“Thina sikhula ukucolwa kwangekhaya lokhu kwakuthiwa okwangaphathi kuphiwa ubabakazi kumbe ugogo. Kwakuthiwa kwenziwa izigubhu ezokuthi umuntu nxa esehambile wayale esezabuya azephinda imikhondo kuzaphekwa sibili kudliwe utshwala lobu sobuphekwa ngubabakazi kodwa ezekuphekela kuleliguma sekudliwa futhi.”
Uphinde wathi lokhu kwakusenza ukuthi imizi yayizolo iqine katshi eyalezi insuku okhuyisivuka mpunzana.