Inengi labantu beZimbabwe abahlala kwele South Africa lithi impumela yokhetho isitshiye bengazi ukuthi bahle bakhohlwe ngokubuyela ekhaya kumbe baphe uhulumende kaMnu. Emmerson Mnangagwa ithuba lokuguqula isimo sezomnotho lezombusazwe eZimbabwe.
Ngesikhathi kulungiselelwa ukhetho, inengi lezizalwane zeZimbabwe kwele South Africa bebeveza ithemba besithi lolukhethe luzaletha uhulumende omutsha ozaguqula isimo ikakhulu kwezomnotho labo babuyele ekhaya.
Kodwak-ke inengi khathesi lithi limpumela ibatshiye bengazi ukuthi benzeni.
UMnu. Bongani Halimana, umgcinisihlalo webandla leZAPU kwele South Africa, uthi kusiya ekhethweni ubezimisele ukubuyela ekhaya ngoba ecabanga ukuthi amabandla aphikisayo azanqoba.
Kodwa uthi ukuchitheka kwalelo phupho sekuphazamise icebo lakhe lokubuyela ekhaya.
“Ngisazoqhubeka ngilapha eSouth Africa ngibhekile ukuthi kuyini kahle kahle okwenzakalayo njengalokho abantu bekhethile inkokheli zabo sibone ukuthi inkokheli lezi ezikhethwe ngabantu zizokhona yini ukuphakamisa zivuselele i economy yelizwe, silethe lamathuba omsebenzi ngoba asikwazi ukubuyela ekhaya siyohlala imsebenzi ingekho.”
Abanye bathi njengoba vele lempilo isinzima kweleSouth Africa sebedidekile ukuthi bazaqondaphi.
Isizalwane seZimbabwe, uMnu. Mchasiseli Gwaza, uthi sekufanele bemukele okukhona ngoba ngeke bephile emazweni impilo yabo yonke.
Le yinto esekelwa ngabanye abathi loba bengalisekeli bebandla leZanu PF, indlela uMnangagwa abesenza ngayo ukhetho lungakafiki itshengise ukuthi ulaso isifiso sokuguqula isimo eZimbabwe.
UMnu. Carnicious Nkala, obencintisa esikhundleni someli wedale lephalamende eGwanda Central emele ibandla leZAPU, uthi sekuyisikhathi sokuthi abasemezweni bekele ukugoqa izandla befuna ukulungiselwa ngabanye isimo esisekhaya.
“… Abantu bakithi bagcwele konke kubo Facebook bayakhulumanje kungela abakwenzayo. Asifundeni ukuthi sifake imali yethu lapho okulomlomo wethu khona siyekeleni ukuthi sitshiyele abanye sisithi bazolungisa ngoba phela abantu abanikezwa ithuba lokuthi balungise bayayengeka beyengeka ngokudla langalokhu okunye okukhona. Lokwethuseleka abantu bayethuseleka sekudingeka amadiasporans ukuthi siqale ukuplanner ukuthi senzani ukuze silithathe leli ilizwe.”
Abanyeke bathi kuzacaca ngemva kwempikiswano yempumela yokhetho ukuthi bayahlala kumbe kuleli kumbe babuyela ekhaya.
