Odokotela abakhalala umsebenzi ngoLwesine batshengisele emigwaqweni lezibhedlela koBulawayo leHarare besithi uhulumende kafuni ukukhuluma labo ngezikhalazo zabo.
Odokotela laba asebelamalanga alitshumi lanthathu bekhalala umsebenzi bathi batshengisele emigwaqweni ukwenzela ukuthi uhulumende akhulumisane labo ngokuthi bahole amadola, uhulumende athenge imitshina ezibhedlela yokwelaphisa izigulane lokunye okumbalwa. Kade bekhalala umsebenzi bezihlalele ezindlini zabo.
UDokotela Myaradzi Sithole, omunye wabodokotela abatsha, uthi kunengi kakhulu okubahluphayo.
“Thina khathesi silezikhalazo zethu, kunje so silezikhalazo zethu. Siqalisa iContract kwakuthiwa sihola iU.S dola kodwa khathesi akusikho. Sifunda esikolo kwakuthiwa kulama Safety Protocols. Omama obelethayo kuthiwa bazithengele ama gloves ngeU.S dola kodwa obaba behola ama bond. Sikhuluma nje khonamanke esibhedlela akulamaphilisi, akulamithi, isibhedlela asiyo miduli. Isibhedlela ngokuphakathi. NgoMarch size sikhalale umsebenzi kwathiwa sizaphiwa amaphilisi lakhathesi akulamaphilisi.”
UDokotela Moyo uqhubekele phambili esithi kabasenelisi lokuphandela imuli zabo.
“Sibuthene nje njengamadokotela sisebenza eMpilo. Siyazama ukuthi sincenge. Sifuna ukuthi bazi ukuthi izikhalazo zethu yiziphi. Into ezwisa ubuhlungu yikuthi silama patients kodwa siyehluleka ukuthi siwelaphe. Imithi ayikho esibhedlela lapha. Asenelisi ukusebenzela imuli zethu, ukubuya emsebenzini siyafuna kodwa sizakwenza lokhu sebelungise izikhalazo zethu.”
Kasenelisanga ukukhuluma ngodaba lolu leziphathamandla zohlangothi lwezempilakahle.