Ababalisi Labafundi Bakhathazekile Ngomkhuhlane weCoronavirus
Ababalisi labantwana abafunda ezikolo ezitshiyeneyo eMatabeleland bathi bakhathazekile kakhulu ngomkhuhlane weCoronavirus COVID-19, owenze ukuthi kuvalwe izikolo elizweni lonke.
Bethula lokhu ngesikhathi ilizwe leZimbabwe liphansi kohlelo lokuvalelwa ezindlini olweLockdown kusenzelwa ukuthi kuvinjwe ukumemetheka komkhuhlane weCOVID-19.
Izikolo sezilamaviki phose ayisikhombisa zivaliwe kulandela ukuqhamuka komkhuhlane lo njalo akukaziwa ukuba ziyovulwa nini.
Umbalisi wezansi yeMaNdebeleni, uNkosikazi Nomusa Nyoni, uthi kazi okuzakwenzakala bevula izikolo ngoba uhulumende usanda kukhuphula iholo labongi labongikazi.
“Sesizwile ukuthi omongikazi bangezelwele imali sesikhangele ukuthi sivula izikolo lathi sizangezelelwa imali ngoba silakho ukubamba lumkhuhlane sifundisa abantwana … Sikhangelele ukuba uhulumende ahle aqale ukusilungiselela limali ayiphe omongikazi kanye lempahla yokuvimba ukubamba lumkhuhlane.”
UNkosikazi Nyoni uqhubeke ethi ababalisi labantwana balakho ukuthelelana lumkhuhlane izikolo zingavulwa.
''Sesinanzelele ukuthi iCovid-19 ithelelwana lula, ababalisi bayathelela abantwana labantwana bathelele ababalisi. Kulobunzima umbalisi usengozini yokugula.’’
Isakhamuzi seKezi, uMnu. Whiteman Moyo, yena uthi labo bakhathazekile ngeholo lababalisi ngoba belakho ukukhalala umsebenzi uma uhulumende engabalungiselanga.
Isifundi eNkayi, uMbaliyemvelo Ngwenya, ucele ukuba izikolo ziphuze ukuvulwa.
“Besicela ukuthi izikolo zingavulwa masinya ngenxa yeCovid-19 njengoba abafundi belakho ukuthelelana umkhuhlane lo. Kunjalo sesizaqala isikhathi somqando lapho abantu abazaphathwa khona lufuba njalo kulendlala.’’
UMbaliyemvele Ngwenya uthi ukhathazekile ngokuswelakala komuthi wokwelapha kumbe ukuvikela iCovid-19.
UMongameli Emmerson Mnangagwa kakatsho ukuba izikolo ziyavulwa nini kodwa NgoLwesihlanu weviki edluleyo uyekethisile iziqondiso zokuba abantu bahlale emakhaya ngakho-ke ilizwe likusigaba sesibili sokulwisana lokumemetheka kweCovid 19.
Asenelisanga ukuthola umbono kahulumende ngesicelo sababalisi semali langokukhathaza abazali, ababalisi lezifundi.
