Uhulumende weZimbabwe ngoLwesine wethule uluhlu lwesikhwama sendleko kahulumende iSupplementary Budget edale lephalamende ngoLwesine.
Umphathintambo kahulumende obona ngezemali, uMnu. Mthuli Ncube, wethule isikhwama lesi phambi kwamalunga edale lephalamende awebandla leZANU PF esingamabhiliyoni phose angamatshumi amabili (RTGS$18.62 billion).
UNcube uthe iskhwama lesi lokhu singeneli inhlelo zonke eziqoqwe nguhulumende.
Uthe uhulumende uzama ukuphathisa inkampani kagetsi eyeZESA ukuthi yenelise ukuthenga ugetsi ngakhoke intengo yawo isikhweziwe kusukela lamhla isuka ku ZWL9.86c/kWh isiya ku ZWL27c/kWh njalo amankambani embayo amaMine azabhadala ngedola lakweleMelika.
“Okunye njalo okwethulwe nguNcube yikuthi isilinganiso seholo lezisebenzi okumele siqale ukukhitshelwa umthelo owePAYE sesiguqulwe sisuka kumadola anamgakhulu amathathu lengxenye- $350, sisiya kumadola angamatshumi ayisikhombisa lengexenye-$750. Ethi le yimizamo kahulumende yokwenza impilo yezisebenzeni zakhe ibengconywana.”
Uphinde wathi uhulumende uzakwesula umthetho wezokuvula amabhizimusi eZimbabwe oweIndigenization Act ukwenzela ukuthi osomabhizimusi bakwamanye amazwe bengesabi ukutshala imali yabo elizweni beseseba ukuthi ingathathwa nguhulumende.
Abantu abanengi bachothoze okwenziwe nguNcube besithi akwethule edale lephalamende akusoze kuguqule isimo sabo.
Bathi kuyamangalisa ukuthi uNcube kakhulumanga ngokudala imisebenzi njalo langeholo lezisebenzi ngesikhathi abantu bethwele nzima ngokukhuphuka kwentengo yempahla okungapheliyo.
Omunye wabadaniswe ngokwethulwe nguNcube nguMnu. Michael Ndiweni, umqondisi wenhlanganiso yabathenga bethengisa impahle eyeVendors and Traders Association.
“Ukukhweza iholo labantu kuqakatheke kakhulu akulangqondo ukuthi umphathi ntambo wezemali athi yena kule mali eseleyo. Nxa sikhangela kodwa kubudget yakhe sibona ukuthi imali zabantu azikhutshulwanga ngokunjalo ke akuzwakali kakuhle ukuthi iSuplus leyo ingaphi isebenzani, lokukhweza amagetsi kutshengisela ukuthi utshaya abantu ngenhlanekela ikakhulukazi asebenze lady uHulumende ngoba yibo abezwa ubuhlungu kakhulu siyakwazi ukuthi imali zabo azikhutshulwanga ”
UMnu. Effort Ncube, ongumncebisi weNational Consumer Rights Association, uvumelana loNdiweni.
‘‘Into endingakalayo yikuthi abantu bakhwezelwe amaholo, ukube kulokhe kutshetshwa kuthwe khona abantu abathelayo sisusiwe ku350 000 yasiwaku750 000 akuncedi ngokuba vele abantu abafiki kuzonalezo imali ezikhulunywayo. Imali yabo incane kakhulu ngakho ke kudingakala ukuthi kulungiswe indaba yamaholo kube sekusithi khona umthelo wakhona uhambe lakhonalokho kodwa ukuguqhula ezomthelo kungalungiswanga iholo elihamba lalokho akusoze kuncede ebantwini.’’
UNcube wengeze ethi izinto ezifunwa ngabantu nxa zingaqondiswanga kufana lokuthi akulungisiswanga lutho.
“Zine izinto ezifunwa ngabantu kodwa uhulumende angazange wazikhuluma,kazange acace ukuthi uzenza njani kule ibugdet yakhe.Eyokuqala yikuthi abantu bonke babe lemisebenzi, kudalwe imisebenzi eyeneleyo elizweni,eyesibili yikuthi abantu abasebenzayo bahole imali eyeneleyo ukondla abantwababo, bazondle labo.
“Eyesithathu yikuthi kuphele amalayini ebank, aphele du angabuyi atholakale futhi. Eyesine yikuthi izinto zonke zitholakale ezifunwa ngabantu,zitholakale ngentengo eyenelisekayo bakwazi ukuhlala ngendlela eqondileyo. Lezo zinto ezine nxa zingekho ku mid-term budget angeke incede lutho.”
Amalunga edale lephalamende awebandla leMDC ale ukungena kulumhlangano etshengisela ukuthi awemukeli uMongameli Emmerson Mnangagwa njengomkhokheli weZimbabwe bethi watshontsha ukhetho.
Umngcinisihlalo webandla leMDC, uNkosazana Thabitha Khumalo, uthi kade bekhumbula abantu ababulawa libutho nyakenye hatshi okwethulwe nguNcube.
‘‘Besikhumbula abanye bethu ababulawa mhlaka August 1 ngokubadubula, njalo namhla besisephalamende lapho esibone khona uemmerson Mnangagwa engena eparliament thina asimhloniphi njengomongameli ngoba watshontsha ukhetho. Njalo sizakuya ecourt sisiya phikisa isinqumo sesikhulumi sedale lephalamende sokusithathela imali yosuku lwalamhla.”