Yisipunepune amaqembu omdlalo wenguqu adlala esigabeni sePremier Soccer League edinga abadlali abatsha phambilini kokuphenduka kwemidlalo le enkundleni zemidlalo ngenyanga kaNhlolanja.
Isikhulumeli seqembu leHighlanders, uRonald Moyo, onguye ophethe isikhundla sika chief executive officer weqembu leHighlanders, uthi bayazizwa izikhalazo zabanye abalandeli balo ezokuthi liphe ithuba abadlali abasakhulayo kodwa bona bathenge abadlali abangaphathisa iqembu ukuba liphakamise isicoco seligi lonyaka.
“Thina kodwa njengeqembu sikhulumile siqala ukuba sikhangelele ukuthatha isicoco seligi. Ngibona angathi lathi singabe sesiwomisele abafana ukuba sithi silemidlalo emithathu singanqobi sibe sesithatha umfana kuqembu le Bosso 90 sithi sesikhangelele kuye ukuthi aphathise iqembu. Kuyabe kuyikuthwalisa nzima abafana abasakhulayo lokho. Yikho ke siphume phandle sayadinga bonalaba esingathi ngabadlali abalesikhathi eside bedlala kuzinga laphezulu.”
Iqembu le Highlanders selithenge umgadli uStanley Ngala kanye lomdlali wenkabeni yenkundla uRahman Kutsanzira, bobabili abakade bedlalela iqembu le FC Platinum, kanye lonozinti uRaphael Pitisi, obekuqembu le Triangle.
Abafana be Bosso kabaqalisanga kuhle imidlalo yeligi njalo bahlezi endaweni yesithathu usuka emsileni wengalane belomklomelo owodwa ngemva kwemidlalo emithathu.
Emsileni wengalane kuleqembu le Bulawayo City lalo elilomklomelo owodwa njalo umqeqetshi weqembu leli uPhilani Ncube laye uthi udinga abadlali abalesipiliyoni ukuze baphuphuke engalaneni.
“Okufunakalayo sibili yi experience ku Premier League. Singakhala siwakhalela sibili ama juniors sisithi ngabantwabethu kodwa akulanto esiyabe siyenza. Kumele sibajikele mbijana mbijana baze balungele ukudlala.”
Kumaqembu ako Bulawayo ele Bulawayo Chiefs yilo eliqale kuhle kakhulu njalo lihlezi endaweni yesithupha ngemva kokuba lidlale imidlalo emibili.
Leliqembu ngelinye lamaqembu amatasatasa ngokuthenga abadlali abatsha njalo unobhala jikelele walo uDumisani Mantula Sibanda uthi lonyaka bazoncintisa ukuphakamisa isicoco seligi.
“Angeke ngithi sikhangelele ukuthi siphakamise isicoco, lokuthi sizasiphakamisa. Kodwa engingakutsho yikuthi nxa siliqembu kasikho kuligi ukuthi sigcwalise inani, kuthiwe amaqembu alitshumi lathobaminwe mbili.
Sikhona kuligi ukuthi lathi silalo ithuba elokuthi singaphakamisa isicoco seligi, kodwa angitsho ukuthi sizasithatha. Engingakutsho yikuthi lonyaka kulonyaka. Lonyaka abantu bengakhangeleli ukuthi sizabe silwisana lokuthi singalahlelwa eceleni. Lonyaka sikhona lathi lapho abanye abakhona khona.”
Iqembu le Chiefs lithenge abadlali abagoqela uObidiah Tarumbwa, uObriel Chirinda, uPerfect Chikwende kanye lomdlali odabuka elizweni lase Ghana uDela Akorli.
Inhlanganiso ye Premier Soccer League ikhuphe umbiko ensukwini ezedluleyo isazisa uzulu ukuba imidlalo yeligi izaphenduka mhla zilitshumi lambili kuNhlolanja ngemva kokuba imiswe kudedelwa ikhefu lekhisimusi kanye lemidlalo ye Africa Cup of Nations.