Bakhathazekile ngoba bengazi ukuba ikusasa ibaphatheleni abadlali bemidlalo etshiyeneyo njengoba inani labafunyanwa belegcikwane leCovid 19, liqhubeka lilokhu liqansa.
Inani labantu asebefunyenwe belegciwane le corona seliphezu kwezigidi ezintathu emhlabeni jikelele njalo liqhubeka lilokhu liqansa mihla ngemihla.
Ukuqhamuka lokumemetheka kwaleligciwane elidala umkhuhlane we Covid 19 kudale ukuba kumiswe ezemidlalo emhlabeni jikelele.
Owayengumdlali weqembu lenguqu ele Bulawayo City, uAyanda Ncube, osedlalela iqembu le Malanti Chiefs Eswatini, uveze ukukhathazeka okukhulu ngokuhlalela emnyameni.
“I-lockdown leyi isitshayelele phansi. Khathesi ngabe sesiqedile iligi okokuthi ngabe sisemakhaya ndawonye lemuli zethu. Silokhu silindile asazi kwenzakalani lokuthi sizaqala nini lokuthi sizayenzani. Silokhu siqhubekela phambili ngenhlelo abasiphe zona ukuze sihlale silungele ukuthi sibuyele siyedlala nxa kungathiwa siphenduke.
Iqiniso kodwa yikuba kuphazamiseke izinto ezinengi njalo ukuhlala ukungazi ukuba kuqhubekani akusiyonto elungileyo,” kutsho uNcube.
Imidlalo yenguqu eyesigaba saphezulu Eswatini imiswe sekusele imidlalo eyithoba minwe mbili ukuba ifike komlindi uyacina.
Eswatini kulabantu abangamatshumi ayithoba munwe munye abatholakale belomkhuhlane we Covid 19 njalo oyedwa wabo wedlule emhlabeni.
ULynoth Chikuhwa yena udlalela iqembu le BR Highlanders elase Botswana kodwa ungakibo ko Bulawayo ngesikhathi abantu belaywe ukuba behlale ezindlini zabo.
Uthi kunzima kabi ukuba ahlale umzimba wakhe ulokhu ulungele ukuba adlale ibhola ngoba engenelisi ukuba aphume ayegijima phandle, okuyinto eqakathekileyo kubadlali bomdlalo wenguqu ukuze imizimba yabo iqine.
Kwelase Botswana kulabantu abangamatshumi amabili lantathu asebetholakale belomkhuhlane we Covid 19 njalo sekwedlule emhlabeni umuntu oyedwa.
Odlala umdlalo webhola lokuqaga, uKaren Mlambo,uthi yena ukumiswa kwemidlalo kuzaphazamisa abanye abakade bedlala labo abangezwa kuhle emzimbeni.
“Kulabanye esidlala labo abakhuthazwa ukuba bephatheke kwezemidlalo ngoba bephethwe yizifo ezehlukeneyo ngoba ukuphatheka kwezemidlalo kuncedisa ukwakha umzimba. Laba bantu sebengagula ngoba akukho lula ukugijima uwedwa usendlini,” kutsho uMlambo.
Inani labantu abalegciwane le corona selisedlula izigidi ezintathu emhlabeni jikelele. Emazweni aphetsheya akhona amazwe aphezu kwenkulumo ezokuba imidlalo yenguqu iqhubekele phambili kodwa isiphathamandla senhlanganiso ye FIFA uMichel D’Hooghe uthi kumele kumiwe kuze kuphele inyanga kaNcwabakazi.