Abadabuka eZimbabwe abahlala esabelweni seLimpopo sebedlela evalweni kulandela ukubotshwa komunye wabo uPrince Themba Willard Dube, okucatshangelwa ukuba wabulala abesifazana abayisikhombisa owabathembisa ukubadingela umsebenzi.
Abakhulume lomsakazo weStudio 7 bathi besaba ukuba balakho ukuhlaselwa yizizalwane zakwele South Africa kulandela ihlazo okuthiwa lenziwe nguDube, ongelamaphepha aqondileyo okuhlala elizweni leli.
Kubikwa ukuba kulezizalwane zakwele South Africa ezithi kumele kuphindiselwe ukubulawa kwabesifazana laba okuthiwa izidumbu zabo zabaphoselwa egangeni nguDube.
Kasenelisanga ukukhuluma ngodaba lolu lamapholisa esigabeni sePolokwane. UDube Dube, omiswe emthethwandaba ngoMvulo, wetheswa amacala okubulala uSarah Mothiba, Moleboheng Mothibeli, Khomotso Makhura, Sanah Sinyatsi, Andrea Cholo, Chisimango Gumbo loJane Letswalo.
UMnu. Ngqabutho Mabhena, owenhlanganiso yeZimbabwe Community in South Africa, uthi abakezwa ngodabuka kwele South Africa osehlasele izizalwane zakwele Zimbabwe kulandela okwenziwe nguDube.
