Kulabadabuka eZimbabwe abahlala eTurffontein asebesuswa emikambo lezindlini abahlala khona yinhlanganiso ebizwa ngokuthi yiSouth Africa First, okukhanya engani incediswa ngamapholisa.
UMnu. Bongani Mkhwananzi, isikhulumeli senhlanganiso eyeZimbabwe Community in South Africa, uthi kuyethusa okwenzakala eTurffontein.
UMkhwananzi uthi abanye abasuswa kuleyondawo ngabasebenza kumankampani atshiyeneyo, okuthiwa bathatha imisebenzi yabadabuka kwele South Africa.
Inhlanganiso eyeSouth Africa First ibike ngeviki ephelileyo ukuba izakwenza iOperation Dudula, eyokususa abantu bokuza emisebenzini, ezindlini lezinye indawo. Ilizwe leli lisanda kubopha abantu abanengi abadabuka eZimbabwe abangena kwele South Africa okungekho emthethweni.
UMnu. Pakishe Aaron Motsoaledi, umphathintambo wendaba zekhaya, uselamaviki amabili efike eBeitbridge lapho aveza ukuthakazelela okwenziwa ngamapholisa labagcina umgcele ababebopha njalo bebisele ekhaya abadabuka eZimbabwe, ababezama ukungena kwele South Africa okungekho emthethweni.
Kasenelisanga ukukhuluma laye labenhlanganiso eyeSouth Africa First ngokwenzakala khonamanje eTurffointein duzane leJohannesburg.
UMkhwananzi utshele uGibbs Dube weStudio 7 ukuba bakhathazekile ngokwenzakala eTurffontein.
