Sokuvuke okunye ukulwisana ebandleni leMDC elikhokhelwa ngumnumzana Morgan Tsvangirai lelinye icele elizibiza ngokuthi yiRenewal Team kulandela imizamo eyenziwa yisithunywa somthethwandaba uMessenger of Court esifuna ukubamba indlu kaTsvangirai kulandela udaba lwezisebenzi ezilitshumi lantathu – 13 ezaxotshwa umsebenzi ezifuna ukubhadalwa iholo.
Amacele womabili la elinye lalo elikhokhelwa nguMnu. Tendai Biti, ethesana icala lokuthi kulezinye iziphathamandla zebandla ezehluleka ukuphatha kahle udaba lwezisebenzi lezi ezaxotshwa ngomnyaka ka2010.
Zahambisa udaba lolu emthethwandaba weHigh Court lapho umahluli uPriscilla Chiguma owathatha isinqumo sokuthi kumele zibhadalwe ingxenye yesigisi samadollar - $500,000.
Okwamanje isithunywa somthethwandaba sesifuna ukubamba indlu kaTsvangirai eseStrathaven eHarare, eyinye indlu yebandla eseChitungwiza kanye lezimota zeMDC ezingamatshumi ayisithupha lambili – 62.
Abaxotshwa umsebenzi babesebenza ukugcina ezomthetho kubandla leli. Omunye wabo ukhangelelwe ukuthola phose inkulungwane ezingamatshumi amahlanu zamadollar eMelika - $48,260 nxa impahla ezabanjwa ingathengiswa yisithunywa somthethwandaba.
Isikhulumeli seMDC-T, UMnu, Douglas Mwonzora, utshele iStudio 7 ukuthi uMessenger of Court wenza lokhu ngoba kulabanye abalandeli beMDC Renewal Team ababaleka lengwalo zokulungisa udaba lolu.
Kodwa-ke uMnu. Sam Sipepa Nkomo okuMDC Renewal Team utshele UGibbs Dube weStudio 7 ukuthi kumele izisebenzi lezi zithole infanelo yazo kubandla elikhokhelwa nguTsvangirai.
IStudio 7 kayenelisanga ukukhuluma lo Messenger of Court eHarare ngokubanjwa kwempahla kaTsvangirai.
Igqwetha elilwela ilungelo loluntu, uMnu. Job Sibanda, utshele iStudio 7 ukuthi nxa uTsvangirai ebhalwe emaphepheni okubophisa iMDC, kulungile ukuthi abanjelwe impahla lidale lomthethwandaba.