Inengi labantu eZimbabwe lithi uhulumende kumele ahloniphe amalungelo oluntu, alwisane lenkohlakalo phakathi kweziphathamandla zakhe andubana kukhulunye ngokwesulwa kwezijeziso zomnotho ezetheswa iziphathamandla zebandla leZanu PF lamankampani adlelana labo ngamazwe angentshonalanga.
Loba inengi livumelana ukuthi lezi zijeziso sezibisele muva intuthuko elizweni, uzulu uthi kungumlandu kahulumende ukuthi ahloniphe amalungelo woluntu ukuze engajeziswa yilawamazwe.
Uzulu weZimbabwe ukhuthazwa nguhulumende ukuthi abuthane endaweni ezitshiyeneyo kusasa ukuze atshaye itoyi-toyi etshengisela ukukhonona ngezijeziso zomnotho ezetheswa iZimbabwe ngesikhathi sombuso kowayengumongameli uMnu. Robert Mugabe.
UNkosazana Lungile Masuku isakhamuzi seGwanda uthi uhulumende weZimbabwe kumele aqale azinuke amakhwapha alwisane lenkohlakalo eselizweni engakakhaleli ukwesulwa kwezijeziso lezi.
“Kunengi lakho abakukhangelayo okumele sikulungisise esehluleka ukukulungisa njenge lizwe asiqaleni sithanyele indlu yethu ngapha singakakhulumi ngokwamasanctions.Kathesi ungakhangele Izacc yenaleyi iyaqalisa ukuthi ibamba iziphathamandla eziphatheke kunkohlakalo , umuntu uyabanjwa lamuhla kusasa evoke sekhitshiwe, ukhangele NSSA ezabo Command Agriculture zonalezi zidliwe zadliwa kodwa thina siyabe silokhu sikhala ngamasanctions.”
Amazwi akhe asekelwe lilunga lebandla leMDC, uMnu. Thandeko Zinti Mnkandla, othi izijeziso lezi zaba khona ngoba kwakukhona okumele kuqondiswe okwasekuphanjaniswa.
“Uhulumende lo kumele akunanzelele ukuthi umhlaba uthi amalungelo abantu asemqoka kwakho konke ngokubana akulanto engenzwanga kuhle ngakho nxa amalungelo lawo elokhu esephulwa abantu betshaywa benyamalala bebulawa kangiboni ukuthi kulomuntu ongaqhubeka esincedisa, izijeziso zomnotho yikutshela ababusayo abagangayo abaxhwalileyo ukuthi yekelani umkhuba wenu lo omubi.”
UMnu. Malachi Nkomo, owebandla leZanu PF, uyakulandula lokhu. Uthi eleBhilithani lethula lezizijeziso njengendlela yokuphindisela kulandela uhlelo lukahulumende lokuthathela abamhlophe umhlabathi.
“UKubakhona kwamasanctions lokhu sekuphambanise impilo zabantu abanengi nengi , sekuphambanise amabhizimusi akuleli ngoba ukuthi abantu baze baphile yikubana balobudlelwano lamanye amazwe awungeke uthole yonke into elizweni lakho.Lawama Sanctions okuthiwa akhona izijeziso zomnotho lezi ngokubono kwami yizijeziso okungamelanga ukuthi nga zikhona bajezisela ukuthi yindaba bona besukume bama bathi bafuna umhlabathi wabo.”
Ocubungula ngezombusazwe, uMnu Mlamuli Nkomo, uthi yiloba yiliphi ilizwe lilakho ukuzikhethela abangane kungakho eleBhilithani leMelika akalacala ngokwethesa eleZimbabwe izijeziso.
“Balelungelo njengamazwe azimeleyo ukuthi bathi asidlelani lozibani kumbe lozibani kungenxa yendlela aphatha ngayo izizalwane zalelolizwe , kufana leZimbabwe layo ilelungelo lokuthi ithi sidlelana lozibani ngezizatho ezithize asidlelani lozibani ngezizatho ezithize.”
Uhulumende wakuleli wethule isinqumo sokuthi kusasa mhlaka 25 Mfumfu kube likhefu ukuze abantu bengayi emsebenzini ukuze bathole ithuba lokutshengisela bekhonona ngobunzima obudalwa yilezi zijeziso.
