Amabandla Abusayo eAfrica Ancindezela Aphikisayo

WASHINGTON DC —  IZanu-PF ibuyele embusweni ngemva kokunqoba okumangalisayo kukhetho olwenziwe ngoNtulikazi.

Amacele eMovement for Democratic Change akhe phansi kulolukhetho okutsho ukuthi kawasekho lakancane kuhulumende womanyano.

Okwamanje asebheke ukhetho oluzakwenziwa ngo 2018 loba kulezikhubekiso ezinengi ezivalela amabandla aphikisa uhulumende ukuthi ancintisane le Zan-PF. Lokhu kuyafana lakwamanye amazwe awezwekazi le Africa lapho amabandla aphikisayo akhahlamezwa ngabusayo.

Kuyaziwa ukuthi amabandla amanengi abusayo awezwekazi le Africa alwisana lenkethabetshabi. Kodwa-ke kusobala ukuthi amabandla la ancindezela aphikisayo ngemithetho efana laleyo eyayisetshenziswa ngabancindezeli abamhlophe.

Amabandla enza lokhu nganjenge Kenya African National Union, iFrelimo ye Mozambique, iMPLA ye Angola, SPLM ye South Sudan le Zanu-PF eZimbabwe.

Kulamabandla aphikisayo amanengi emazweni la lapho athwele nzima ngokukhahlamezwa ngabusayo.

Kambe kuyini okuhluphayo la? Kusobala ukuthi uhlupho lolu lungabe lwaqalisa ngesikhathi sempi yomhlaba wonke iWorld War 2. Amabandla ayelwisana lokuncindezelwa ngabamhlophe athola uncedo eSoviet Union kanye le China.

Amazwe la womabili ayethakazelala umbuso wenengi ngakhokhe akhetha ukuncedisa amawe awezwekazi le Aafrica okuyinto engenziwanga ngamazwe angentshonalanga.

Umqondo we Soviet Union le China ukhanya wagxhila emabandleni ayelwisana lenkathabetshabi eTanzania, Kenya, Mozambique, Democratic Republic of Congo, Angola, Namibia lamanye amazwe.

Ibandla le Chama Cha Mapinduzi eTanzania ngelinye elake labusa kungelabandla eliphikisayo. Isikhulumeli sebandla leli umnu. Nape Nnauye uthi kwake kwafika isikhathi lapho inkokheli yebandla lakhe eyayingafuni ukuphikiswa isesembusweni.

Uthi okwamanje sokulamabandla amanengi elizweni lakhe loba engakhanyi ukuthi enzani.

Umnu. Mathew Siphosa obencintisa isikhundla sokuba ngumsekeli kamongameli kukhetho olusanda kwedlula kubandla le African National Congress yakwele South Africa uthi manengi amabandla abusayo angaziyo ukuthi amabandla abusayo ameleni.

Kodwa-ke uthi ibandla le ANC likhuthaza ukubunjwa kwamabandla eSouth Africa njengalokhu okufiswa nguzulu kulelo lizwe.

Umnu. Joram Gumbo owalwa impi yenkululeko ekuvuyo lebutho lezanla ele Zanu-PF njalo olokhe eyisiphathamandla saleli bandla uthi amanye amabandla aphikisayo anjenge MDC aduba ngokudlelana lamazwe entshonalanga afuna ukugenqula umbuso ngendlela yokuwubisela ezandleni zabamhlophe.

UMongameli Robert Mugabe usebuse okweminyaka engamatshumi amathathu lantathu eZimbabwe lapho adiliza khona i-zapu. Okwamanje uthwalise nzima amabandla eMDC lamanye aphikisayo. Kambe uzaqhubeka na ewathwalise nzima amabandla la? Akwaziwa ukuthi kozalwa nkomoni!

Esigabeni esilandelayo sixoxa leziphathamandla zamabandla aphikisayo anjenge Sudan People’s Liberation Movement for Democracy, iDemocratic Progressive Party ye Malawi, amabandla eMDC kanye le Zapu ngokuthi aphilisana njani lamabandla abusayo.