Ziyakhala iziphepheli ezihlala eDukwi Camp kwele Botswana ezithi zibiselwa ngenkani ekhaya yinhlanganiso ebona ngokuvikela iziphepheli eyeUnited Nations High Commission for Refugees, uhulumende wakwele Bostwana kanye lowe Zimbabwe.
Sokubiselwe abanye ekhaya abathi babalekela ukutshaywa ngabalandeli bebandla leZanu PF kulandela ukubunjwa kwebandla eliphikisayo eleMDC kanye lokhetho lwelizwe kusukela ngomnyaka ka2000.
Banengi abathi babiselwa eZimbabwe ngenkani kubakhona njalo abanye abafisa ukuyahlala emizini yabo besithi bakhathele ngokuba yiziphepheli kwele Botswana.
UMnu. Weston Chibi, owabaleka eZimbabwe ngomnyaka ka2004 wayaphephela kwele Botswana kulandela ukutshiswa komuzi wakhe eMarange ngathi ngabasekeli bebandla elibusayo, uthi kumele alungiselele ukuya eZimbabwe ngoMvulo loba esesaba ukuba uzabotshwa kumbe atshaywe ngabakubandla leZanu PF.