Abantu beziqintini zeMangwe leBulilima bamukele ngenjabulo umbukiso oweQogelela Expo besithi usuthuthukise imuli zabo wehlisa ubuyanga osokwenze imuli ezinengi ezingamalunga wohlelo lweQogelela zithole inzuzo yokuziphilisa.
Ekhuluma ngemva kokuvula okusemthethweni kombukiso walonyaka oweQogelela Expo 2019 esikolo sePlumtree High School, umphathintambo obona ngenhlelo zabesifazana labasakhulayo, uNkosikazi Sithembiso Nyoni, uthi uyajabula ngokubona amakhosikazi ephatheka kumisebenzi yokuzithuthukisa.
''Ngilokuthokoza okumangalisayo ngoba abantu abanengi ungabapha imali yokusungula bayayidla kodwa laba omama banikwa imali yokusungula (uhlelo lolu) bayikhulisa. Ngizwa kuthiwa balemali enengi yamaRand, sebethenge izigayo bagebha lemiodi yamanzi, sebezifundisela abantwana, labobaba abavela sebenza eGoli bathole amakhaya emahle njalo bayathengelana lempahla.''
UNkosikazi Nyoni, olilunga ledale lephalamende emela iNkayi North, uncome ukuphatheka kwabesilisa kuhlelo lweQogelela.
''Omama lapho obaba bengasisekeli sibalobunzima obukhulu. Laba omama abaphumelelayo kutshengisa ukuba kulabobaba abasekelayo. Labo abangela bobaba abasekelayo kwenza omama badonse nzima ukuze bafinyelele kwabanye. Siyathaba kakhulu ngoba okulapha sibone ukuba obaba basebenza ndawonye labomama njalo lokho siyakukhuthaza.''
Obona ngokuqhutshwa kwenhlelo zeQogelela eCommunity Foundation for the Western Region Foundation, uMnu. Nomathamsanqa Moyo, uthi umbukiso weQogelela Expo sebezawuqhuba minyaka yonke.
''Indlela yokuthokozela indlela yokuphumelela kukaQoelela kuzigaba eziphuma eMangwe leBulilima sesizabuqhuba minyaka yonke kugoqela lezinye iziphathamandla ezisuka kunhlangothi ezehlukeneyo ezweni.''
Umgcinisikhwama kaQoelela eMpandeni, uNkosikazi Lilian Macebo, uthi luhlelo oluhle oseluthuthukise isigaba sabo.
''Uhlelo lweQogelela luhlelo oluhle kakhulu sicela abantu baqhubeke besekela inhlelo zethu zokuthuthukisa amabhizimusi ethu ngoba sithuthukisa ezempilakahle ezigabeni zethu njalo siyancedisa abaswelayo lentandane ezikolo sisebenzelana lababalisi.''
UNkosikazi Nomusa Moyo, omele isigaba sakoNdiweni, laye ubonge uhlelo lweQogelela esithi abasasweli esigabeni.
''Uhlelo lukaQogelela selusithuthukisile esigabeni sethu okwamanje silohlelo lokufuya inkukhu zemakhaya sesiqalile ukuzithengisa njalo sikhangelele ukuvula ivinkili elincane esigabeni sethu. Siyalubona uhlelo lweQogelela.''
Uhlelo lweQogelela luqhutshwa ngamaqembu alikhulu alamalunga angamatshumi amabili ngalinye eziqintini zeMangwe leBulilima.
Embukisweni weQogelela Expo 2019 bekubukiswa imisebenzi eqhutshwa ngamalunga eQogelela emangweni yabo.
