Amapholisa edolobheni leGwanda abophe otsheketsha abafika amatshumi ayisithupha emadabukakusa lamhlanje endaweni yeVova lapho inengi elemba igolide okungekho emthethweni.
Lokhu kulandela ukubulawa kwabantu emigodini yegolide kusetshenzisa amabhemba.
Ababotshiwe laba batholakele belimitshina yokudinga igolide, amahloka kanye lezinduku lapho behlaselwa ngamapholisa lamhla ekuseni.
Isikhulumeli samapholisa eZansi yemaNdebeleni uChief Inspector Philisani Ndebele uthi ababotshiweyo laba bagoqela obaba abangamatshumi amane lane kanye labomama abalitshumi lasithupha ababikwa bebethengisa impahla ezibalisa utshwala.
Lokhu kuza ngesikhathi kulokukhathazeka elizweni lonke jikelele ngezimbamgodi ezihamba zibulala abantu zisebenzisa amabhemba zibathathela imali kanye legolide ezaziwa ngokuthi ngamaShurugwi.
UChief Inspector Ndebele uthi amacala okubulala kusetshenziswa amabhemba sevamile kulumango kungakho bethethe lelinyathelo.
“Indaba leyi okuthiwa Mashurugwi yibala eseliphongu setshenziswa ebantwini bonke abenza amacala so amacala wonalawo okulimaza abanye kumbe ukubulala kusetshenziswa amabhemba akhona ngoba singakhuluma ngelast week ngoLwesihlanu kumbe ngoLwesine sibe lemurder okusetshenziswe khona amabhemba eMphoengs. Sibelamanye amacala anjalo ngangemuva so asingeke sithi ngapha eMatabeleland South awakho kungakho yikho siyenze iraid leyi ukuthi sizame ukuthi kube lokuthula esigabeni.”
Nyakenye endaweni yeVova kubulewe omunye utsheketsha kusetshenziswa amabhemba kulwisana aMaNdebele labeSiShoneni.
UNdebele uthi bazaqhubeka behlasela kuzozonke indawo okwenjiwa khona igolide okungekho emthethweni.
Unobhala jikelele wenhlanganiso yezimbamgodi eyeZimbabwe Miners Federation, uMnu Philemon Mokuele, ukhuthaza amalunga ukuba asebenze okusemthethweni ngoba inyathelo elithethwe ngamapholisa liqondile njalo lizehlisa ukudalwa kwamacala.
Ababotshiweyo bavalelwe enkambeni yamapholisa eyeGwanda njalo bakhangelelwe ukumiswa phambi komthetbwandaba besetheswa amacala atshiyeneyo abalisa elokwemba amatshe aligugu okungekho emthethweni. Ukwemba igolide okungekho emthethweni kulesigwebo seminyaka emibili entolongweni. Inengi labasakhulayo kulesisabelo liphila ngokwemba igolide okungekho emthethweni ngenxa yokuswelakala kwemisebenzi.
