Uzulu wezansi yeMaNdebeleni wethukile ngokuqonga kwenani lalabo abatholakale belegciwane leCoronavirus abavelela kwele South Africa abavalelwe eBeitbridge.
Lokhu kuza ngesikhathi kulembiko ethi inengi lichapha umngcele okungekho emthethweni kukanti abanye bayabaleka lapho abagcinwe khona okulakho ukumemethekisa leligciwane.
Abogatsha lwezempilakahle bathi sebelitshumi lasithupha asebetholakale belegciwane leCoronavirus, kuthi abathathu babo yizizalwane zakweleMalawi ezabanjwa zichapha umngcele okungekho emthethweni.
Abalitshumi lantathu yizizalwane zeZimbabwe ezizikhethele ukuza ekhaya zisuka kwele South Africa ezisagcinwe eBeit Bridge.
Laloba laba bengene elizweni okusemthethweni banengi abatshungubalayo kulumngcele besiyathenga impahla kweleMusina okulakho ukudala ukumemetheka kwaleligciwane
UMeya wedolobho leBeitbridge uMnu. Morgan Ncube uthi sebebhalele kuhulumende becela ukuba kuvunyelwe ihlekana labantu ukuyathenga impahla phetsheya ukuze inani lalabo abachapha okungekho emthethweni liyehle.
“Ngibhalele uhulumende incwadi sicela ukuthi kube lenanai labantu abazavunyelwa ngeviki ukuthi bachaphe bayethenga emthethweni okusemthethweni ukwenzela ukuthi bahlolwe ekuphendukeni kwabo ngaleyondlela singanciphisa inani labantu abachapha okungekho emthethweni befaka impilo zabantu engozini.”
Sokwethuse abanengi ababalisa, uMnu. Daniso Mpande, oyisakhamuzi seGwanda ukuthi kulombiko othi abanye balabo abagciniweyo eBeitbridge abangaba amatshumi phose amathathu babalekile kulezondawo bengakahlolwa.
“Esikucelayo kuhulumende yikuthi nxa nga befikile bagcinwa lapho abagcinwa khona akube lesecurity eqinileyo ezakwenza ukuthi bengaze bafohla uhulumende kabasekele bekuzonalezo indawo bengaze bahlangana lomphakathi.”
UNkosazana Lungile Masuku esinye njalo isakhamuzi seGwanda, uthi abomthetho abamkela imali yokufumbathiswa kumfula uLimpompo ukuze uzulu adlule bazadala ukumemetheka kwaleligciwane emhlubulweni wezansi yeMaNdebeleni.
“Inkinga esilayo lapha eZimbabwe ngamapholisa ethu lamasotsha avumela ubugwelegwele obunjalo bona okwabo abakugijimisayo yimali ukuthi umkhuhlane uzamemetheka abakudingi kodwa okusalayo yikuthi thina njengeMatabeleland South sizaphela ngobunengi.”
UMqondisi wezempilakahle ezansi yeMaNdebeleni, uNkosazana Rudo Chikodzore, uthi izakhamizi zeBeitbridge zilomlandu wokubikela abomthetho ngalabo abangena elizweni okungekho emthethweni ukuze zingahlaselwa yileligciwane.
Kusenjalo, umanisipala wedolobho leGwanda sexwayise labo abathengisela ezindlini ukuba bame lumkhuba ngoba kuyikwephula umthetho ofakwe nguhulumende wokwenqabela ukumemetheka kwegciwane leCoronavirus.
Inengi ebelithengisela emisekeni edilizwe nguhulumende beselithengisela ezindlini njengendlela yokuziphilisa. Umanisipala uthi uzaqala ukubhoda ngezindlu esebenzelana lamapholisa njalo labo abazatholakala bethengisa bazawukhomba umuzi olotshwala.
UMnu. Patriotic Ndlovu, omunye walabo abaphila ngokuthengisa, uthi kazi ukuthi sezaphila njani.
“Mina ngimadolonzima engikubonayo ngohulumende lo ngibona umuntu ongakwazi ukunakekela abantwabakhe okokuthi umumo unje so abantu belenyanga ezimbili bengasebenzi abuye athi abantu bengathengisi so abantu laba bayengaphi bayetshontshan yini?”
Ukuqonga kwenani lasebetholakale beleCoronavirus eZimbabwe, lisiya kwabalikhulu lamatshumi amathathu lambili -132, inengi labo kuyilabo abavelele kwele South Africa, sokusethusa abanengi abathi kuzadala ukuba leligcikwane limemetheke ngamandla emhlubulweni wangezansi yeMaNdebeleni lapho okulomngcele wamazwe womabili.
