Odokotela beZimbabwe asebesebenze okwesikhathi eside ezibhedlela zikahulumende amasenior doctors asebemanyene lamajunior doctors ukukhalala umsebenzi bekhala ngokwandelwa ngumsebenzi ngenxa yabanye babo abaqalise ukukhalala umsebenzi ngenyanga ephelileyo bekhala ngeholo eliphansi.
Odokotela laba esixoxe labo ngoLwesine batshele iStudio 7 ukuthi abasenelisi ukusebenza bodwa njengoba kugcwele zizigulane ezidinga uncedo lokwelatshwa.
Bathi akusasebenzeki ezibhedlela ezinkulu ezinjenge Mpilo, Parirenyatwa, United Bulawayo Hospitals le Harare Hospital.
Abantu abanengi babikwa bengasatholi abakudingayo ezibhedlela ngenxa yokukhalala umsebenzi okwenziwe ngodokotela bonke laba. Inengi labantu selikhangelelwe ukuyadinga uncedo kobodokotela abazimele bodwa ababiza imali enengi yokwelapha.
UDokotela Lovemore Mbengeranwa umqondisi weHealth Service Board utshele iStudio 7 ukuthi uzadingisisa ukuthi kuhamba njani kubodokotela abakhalale umsebenzi izolo lalabo asebehlezi okwesikhatshana bengayi emsebenzini.
UDokotela Mbengeranwa uthe kukhanya engani ukutshengisela kwabadokotela bonke akukho emthethweni. Uphinde wathi ulethemba lokuthi konke lokhu kuzalungiswa loba nje uhulumende engela mali.
Sixoxe njalo loDokotela Masibongenisonke Mloyiswa omunye wabodokotela abasakhulayo otshele uGibbs Dube weStudio 7 ukuthi uzulu usethwele nzima ezibhedlela.
Isakhamuzi sakoBulawayo, uMnu. Ambrose Sibindi, uthi abantu makhaza sebethwele nzima ngokuswela uncedo ezibhedlela.