Owayengumdlali weqembu lesizwe elama Warriors uNoel Kaseke uthi ukuziphatha kuqakathekile kubadlali bomdlalo wenguqu abasakhulayo.
UKaseke, ongumsekeli kamqeqetshi kuqembu le Dibba Al – Hissin Sports Cultural Club ngase United Arab Emirates, uthi ukuzimisela lokuziphatha kahle kulakho ukudala umehluko phakathi kokuphumelela longaphumeleli emdlalweni wenguqu.
“Ngiyalokhuthaza bafana abasakhulayo abafuna ukudlala ibhola ukuba kumele libe le discipline kanye lokuzinikela ngoba nxa lingelakho khonalokho kokubili alisoze lenelise ukuphumelela ngoba kuqakathekile kakhulu.”
UKaseke ukhulele kuqembu leHighlanders edlala kumaqembu abasakhulayo lapho aqeqetshwa khona ngu Ali Dube.
Ngemva kwalokho uqale ukudlala kuqembu elikhulu ele Highlanders lapho asebenze khona labaqeqetshi ababalisa uRahman Gumbo, lasebadlula emhlabeni abathi uBenjamin Moyo, uWillard Khumalo kanye lo Eddie May.
UKaseke uthi bonke abaqeqetshi laba kanye labazali bakhe babeqakathekisa ukuziphatha kanye lokuzimisela njalo imfundiso yabo yiyo eyenze waze wayadlala lasemazweni.
Uke wadlala emazweni abalisa ele Albania, eIndia, eCyprus kanye lase United Arab Emirates.
UKaseke uthi ukuba ngumuntu olalelayo olembeko kuqakathekile khathesi ngesikhathi umhlaba uhlaselwe ngumkhuhlane we Covid 19.
“Ngiyalicela Mthwakazi omuhle ukuba sihlale phansi sizivikele emkhuhlaneni lo. Ngiyazi sibili abanye siyabe sifuna ukuselela imuli kodwa sizayiselela njani nxa sesigula singasezwa kuhle. Leli lithuba esiliphiwe nguNkulunkulu ukuba sichithe isikhathi lemuli ngoba inengi lethu besingasitholi lesosikhathi ngenxa yemisebenzi.
“Kufana lokuthi yi half time esiyiphiwe nguNkulunkulu eyokuthi sihlale phansi sihlolisise ukuba besiphila njani njalo silungisise lapho ebesiphazamisa khona.”
UKaseke uke wadlalela leqembu lesizwe elama Warriors njalo uleminyaka emithathu ethethe umhlalaphansi.
Phambilini kokuba ngumsekeli kamqeqetshi kuqembu alisebenzela khathesi uke waba ngumsekeli kamqeqetshi kuqembu le Al Hamriya.
