Uhulumende wakwele Melika uthi awucaci umkhankaso wamazwe akumanyano owenhlanganiso yangezansi kwezwekazi leAfrica iSouthern African Development Communtiy (SADC), owokukhankasela ukukhitshwa kwezijeziso zomnotho ezetheswa inkokheli yeZanu PF, osungulwe nguhulumende weZimbabwe nyakenye.
EleMelika lithi lokhu yikudlalisa isikhathi ngoba kumele kulungiswe konke okufunwa ngamazwe entshonalanga athi uhulumende weZimbabwe ukhahlameza uzulu.
Ummeli weMelika eZimbabwe, uAmbassador Brian Nichols, utshele iStudio 7 ukuba ngabe uhulumende weZimbabwe usebenzisa lelithuba ukulungisisa amaphutha enza lezi zijeziso ziqhubekele phambili.
UNichols uhti okumele kulungiswe kugoqela ukulondoloza ilungelo likazulu, ukuqhuba ukhetho olubalulekileyo lokunye.
Uthi zingeke zesulwe izijeziso lezi nxa uhulumende angalungisanga lokhu.
“Injongo yethu yikusiza eleZimbabwe ukuba liphumelele ngakho siyakholwa ukuba ingaba khona leyo nguquko edingakalayo, eyathenjiswa nguhulumende kaMnangagwa ngesikhathi ekhankasela ukhetho edinga ukuvotelwa, kungenza liphumelele lelilizwe. Kungakho ekhuthazwa uhulumende weZimbabwe ukuthi enze ibekhona leyo nguquko kwezombusazwe, ezomnotho lokuthi azilandele ngokwaneleyo lezo ziqondiso zemhlabeni wonke jikelele kwezokulondolozwa kwelungelo loluntu.”
UAmbassador Nichols uthi izijeziso lezi ziqondiswe kuphela kulabo abephula ilungelo loluntu kanye labaphatheke emsebenzini yenkohlakalo hatshi lokho osekutshiwo nguhulumende weZimbabwe ukuba ziphazamisa impilo yabantu bonke.
“Loluhlelo lwezijeziso luqondiswe kubantu abangu 83 kuphela lamankampani kumbe inhlanganiso ezisebenzisana lalaba bantu, ezingu 37. Lezi kungaba ngeziphatheke kundaba zokwephula ilungelo loluntu kumbe ukuphatheka kumisebenzi yenkohlakalo. Inkinga esilayo yikuba kabazihloniphi indlela zokwenza izinto ngokusemthethweni, okuyikhona esizama ukubabonisa khona lokho ngaphansi kwaloluhlelo lwezijeziso zomnotho eziqondiswe kubo.”
Isakhamuzi seGwanda, uMnu. Ndaniso Mpande ,uthi uhulumende weZanu PF uyazi mhlophe amele akwenze ukuze zisuswe lezi zijeziso.
“Into le eyama sanctions ilula kakhulu nxa kuyikuthi uhulumende weZimbabwe eqinisile sibili ukuthi kayifuni. Kayekele ukuhlukumeza izizalwane zakhe, kayekele ukuhlukumeza abantwana beZimbabwe, kayekele ukuhlukumeza abantu abangela macala, kayekele ukuhlukumeza abantu abazenzela amalungelo abo asesisekelweni sombuso. Kahloniphe amasiko kaMthwakazi, kahloniphe amasiko kaMambo, kahloniphe amasiko eMutapa, kahloniphe amasiko eRozvi, kahloniphe amasiko eManyika.
“Thina asihlukunyezwa ngama sanctions, asihlukunyezwa yizo lezo zijeziso zomnotho, sihlukunyezwa yikwehluleka ukuphatha lokwehluleka ukubusa. Wonala ama sanctions abakhala ngawo uSmith wayelawo. AkaSmith ayevele esedlula awabo khatshana le. UNelson Mandela wayelama sanctions afanayo, asuswa three months after efile, kodwa iSouth Africa ingaphi namuhla?. Yayingaphi iRhodesia ngaphansi kukaSmith, lamuhla singaphi? Abayekele ukuhlukumeza abantu, abayekele ukuthi khona, khona besehluleka ukubusa lokuphatha besebesithi khona, khona ngamaSanctions, hatshi cha, akulanto enjalo.”
Kunsukwana ezisanda kwedlula, unobhala wogatsha lwezokukhitshwa kwemibiko, uMnu. Nick Mangwana, ulobe enkundleni yeTwitter ekhuza abasakhulayo, abasanda kuphutsha izifundo zabo zeUniversity ukuba behlukane lomkhuba wokukhankasela ukuqiniswa kwezijeziso ezafakelwa inkokheli yeZanu PF.
UMangwana uthi yikho osekusenza bayiswele imisebenzi abakhala ngayo esithi zibulala umnotho welizwe nanku amankampani amanengi sewavala ngoba esengenelisi ukufinyelela imali yaphandle ukuqhuba amabhizimusi abo.
IMelika yafakela uhulumende weZimbabwe izijeziso zenotho ngomnyaka ka2003 esetheswa umlandu wokwephula ilungelo likazulu lokwenza ukhetho olungaqedakaliyo.
Okwamanje kuleziphathamandla zebandla leZanu PF lezikuhulumende ezingamatshumi athobaminwemibili lanhlanu - 85 lamankampani adlelana leziphathamandla lezi angamatshumi amahlanu lane - 54 akuluhlu lwezijeziso zeMelika. Ocine ukufakwa kulolu luhlu ngusomabhizimusi, uMnu. Kuda Tagwirei, lompathintambo obona ngogatsha lwensoli, uMnu. Owen Ncube.
Amabhanga amabili athi eleInfrastructure Development Bank of Zimbabwe leleAgricultural Development Bank akhitshwe kulolu luhlu lonyaka.
Unobhala jikelele womanyano weSADC, uDokotela Stergomena Tax, ubike ukuba sebemanyana leZimbabwe ukukhankasela ukususwa kwalezi zijeziso ngoba sebekubonile ukuthi aziphambanisi intuthuko yeZimbabwe kuphela kodwa leyemazweni wonke asemhlubulweni wangezansi kwezwekazi leAfrica.
