Ibandla leMovement for Democratic Change (MDC) elikhokhelwa nguMnu. Nelson Chamisa lithi abalandeli balo sebevemulele ukuthi ukutshengisela emigwaqweni yikho okungalungisa okunengi okubhekwa ngabantu kwele Zimbabwe.
Loku kwethulwe nguChamisa ngoLwesithathu eHarare ngesikhathi ekhulumisana lentathelizindaba ngokwenzakala elizweni.
UChamisa uthe abantu bazimisele ukungena emigwaqweni ngoba bayahlupheka okumangalisayo.
Ugcizelele esithi kumele kube lokukhumisana umlotha eZimbabwe ukwenzela ukuthi abantu abakumabandla atshiyeneyo bahlalisane njalo lelizwe lithuthuke ngemfanelo.
Isikhulumeli seMDC, uMnu Daniel Molokeli, wazise ukuba abantu abanengi sebekhathele ngebandla le ZANU PF.
“Abanengi vele sebesithi selisiphuzele thina … Phansi ngale abantu sebedubukile. Wonke umuntu ohlala eZimbabwe uthi sesiphuzile.”
Omela iMatebeland North edale lephamande engoweMDC, uNkosazana Evelyn Masara, uthi abantu sebelindele ukutshengisela.
“Abantu okwakuqala yikuthi bakhathele abala choice. Thina asilalutho vele siyazidubekela okukhona bazangena ezitaledeni. Abantu bayafuna.”
Umgcinisihlalo webandla le MDC uNkosikazi Thabitha Khumalo uveze ukuba njengabomama bazimisele ukutshengisela.
“Lingakhangela udubo esilalo elizweni udubo olukhona ngomama. Indubo ezikhona zenza kube lokutshaywa kwabomama ezindlini. Obaba kabasenelisi ukusigcina bandise ukuqeda udubo kubomama.”
Kodwa omela abatsha kubandla leZANU PF, uMnu. Mabutho Moyo, uthi kumele uChamisa akhulumisane loMongameli Emmerson Mnangagwa ukuze balungisise okuhluphayo elizweni.
“Ubaba uChamisa kumele ananzelele ukuba kwele Zimbabwe akulandubo ezikhona kwezembusazwe. IPOLAD (Political Actors Dialogue) yenzelwa ukuba wonke umuntu kabuye sibonisane sibambisana.”
Lokhu kusekelwe ngomela abenhlanganiso yeNational Youth Service, uMnu. Andifasi Banda, othi bona kabavumelani lokutshengisela lokhu.
“Thina njengamalunga eNational Service Graduation, asisoze sibe yingexnye yabo. Asisoze siphatheke kundaba zobudlwangudlwangu. Simele intuthuko elizweni.”
Ezinye ingcwethi ezicubungula ezombusazwe zithi ukutshengisela osokuke kwenziwa elizweni ngaphambilini, akuzange kulethele uzulu okubambekayo.
