Ezinye izizalwane zeZimbabwe zithi kuyamangalisa ukuthi uNkosikazi Joice Mujuru owaxotshwa kubandla leZanu PF wethulwe ugwalo kokuthuthukisa iZimbabwe engakabumbi ibandla lezombusazwe.
Zithi lokhu kuyafana lokuzingela umuntu ethwele isawudo. Abanye bathi kukhanya engani uMujuru ubanjwa ngamandla ukuthi abumbe ibandla lakhe ecatshangelwa ukuthi lizabizwa ngokuthi yiPeople First.
Kodwa-ke abalandeli bakhe ababekubandla leZanu PF bathi inhlwa kayibanjwa ngekhanda.
Bathi kungaba lokugedla kwamazinyo nxa bengabumba ibandla labo ngesiphangiphangi njengoba elikaMongameli Robert Mugabe lizonda amabandla aphikisayo.
UMujuru wethule izinqumo zalokho angakwenzela uzulu nxa engakhethwa kugwalo olujulileyo olubizwa ngokuthi yiBlue Print to Unlock Investment and Leverage for Development.
Ukuze sihlaziye udaba lolu, IStudio 7 uxoxe loMnu. Rugare Gumbo, isikhulumeli sikaNkosikazi Mujuru loMnu. George Mkwananzi ingcwethi kwezombusazwe ezimele yodwa.
UGumbo uthi sokuseduze ukuthi babumbe ibandla labo.