Ibandla leNational Constitutional Party (NCA) lithi uMongameli Robert Mugabe wenze iphutha ngokukhetha abasekeli bakhe ababili kubandla leZanu PF abakhangelelwe ukufungiswa ukuthatha lezi zikhundla kuhulumende kusasa.
Ibandla leNCA ithi uMugabe wakhetha umsekeli oyedwa esanda kuvotelwa nguzulu ngakho-ke bekungamelanga adinge omunye aze aqede isikhathi sakhe seminyaka emihlanu ewofisini.
Ibandla leli lithi uMugabe wephule isiqanyana salokho okubizwa ngokuthi yiSchedule Six yesisekelo esitsha sombuso welizwe esithi lowo okhethwe ukuba ngumongameli welizwe kumele adinge umsekeli kumbe abasekeli bakhe ngesiphangiphangi.
Ibandla leli lithi isiqanyana lesi sikubeka sobala ukuthi umongameli akumelanga adinge abasekeli abedlula ababili nxa esevotelwe.
UMugabe wakhetha uNkosikazi Joice Mujuru esanda kungena ewofisini ngomnyaka ophelileyo. Usanda kumxotsha umsebenzi esithi wayefuna ukugenqula umbuso wakhe.
Ingcwethi kwezemithetho uMnu. Alex Magaisa weKent University eBhilithane utshele iStudio 7 ukuthi iNCA iyitshaye ekhaleni.
Uthi okungahlupha yikuthi idale lomthethwandaba eleConstitutional Court lingala ukuphatha udaba lolu kumbe ithi umongameli usebenzisa amandla akhe ukuthi akwenze konke lokhu.
Imbono yakhe isekelwe nguMnu. Lizwe Jamela igqwetha elikhangelane lelungelo loluntu otshele uGibbs Dube weStudio 7 ukuthi kumele uzulu akhangelane kakhulu ngokuxotshwa komsekeli kamongameli uMujuru okungekho emthethweni.