Kulamalunga ebandla leMDC-T, ekhokhelwa nguMnu. Douglas Mwonzora, abangafuni ukungena kukhetho lwama by-elections besithi uMwonzora labanye bakhe bakhahlameza uNkosazana Thokani Khupe.
Bathi uMwonzora usezama ngamandla wonke ukuba axotshise uMaKhupe edale lephalamende ngoba wesaba ukuthi ezamthathela isikhundla emhlanganweni wokukhetha inkokheli entsha ozakwenziwa lonyaka.
UMnu. Ntando Ndlovu, umcebisi kaMaKhupe, uthi banengi abalandeli bebandla leli abathi kabasafuni ukulimela kukhetho oluzayo.
UMnu. Witness Dube, okuhlangothi lwebandla leli olubona ngokwethulwa kwemibiko, uthi labo abasuse amagama abo kugwalo lwabafisa ukumela ibandla leMDC-T kade bengakakhethwa ukuthi bazangena kukhetho oluzayo.
Ibandla leMDC-T lahluthunelwa uMnu. Nelson Chamisa ibizo leMDC Alliance elasetshenziswa ngomnyaka ka2018 kuqhutshwa ukhetho lwelizwe.
Umthethwandaba wanika ibandla leMDC-T imvumo yokuthi kumele kwenziwe ukhetho lokudinga ozangena esikhundleni sikamuyi uMorgan Tsvangirai.
UMwonzora, owanqoba kukhetho lolu, wathi njengoba uTsvangirai wayekhokhela umanyano weMDC Alliance sekumele azibambe esidukwini.
Uthi akulamuntu okumele ancintise ukhetho esebenzisa ibizo leli kukhetho lwama by-elections njalo lakukhetho oluzakwenziwa ngomnyaka ka2023.
