Ingxabano ebekhona phakathi kukamabhalani omkhulu wedolobho lakoBulawayo, uTown Clerk lomsekeli kaMeya, isiphange yaguquka yaba ngeyokubandlululana ngemihlobo njalo sekulexuku labantu abathile eselikhankasela ukuxotshwa kwabokhansila bonke abakhuluma ulimi lwesiShoneni.
Obebambe isikhundla sika Meya, uMnu. Tinashe Kambarami, umise umsebenzi uMnu. Christopher Dube esithi wehlulele ukulungisa udaba lwamanzi njalo weba imali yezakhamizi.
UDube uyakuphikisa lokhu esithi uKambarami uqhuthaza ukubandlululwa kwabantu abadabuka eMatabeleland leNkabazwe.
Umgcinisihlalo wohlangothi lwabesifazana ebandleni leMDC koBulawayo, uNkosikazi Tendai Masocha, uthi ukhathazekile ngokwenzakala kulelidolobho, ukutshayana lokuxotshana ngenduku, esithi lokhu akwakhi isizwe.
“Ngizwa ukukhathazeka ngokwenzakala koBulawayo ukutshayana lokugijimisana ngenduku okwenzakale eCityHall. Akusikho buntu lobuyana, akwakhi isizwe njalo ngubani ongabuya ukuzo Investor endaweni elabantu abahlala bethwalelane amahloka.”
UNkosikazi Masocha wengeze esithi bazaqala uhlelo lokubonisana labantu ngobubi bokuxasana ngemihlobo.
‘‘Thina njengabantu akumelanga sivumele ukuxatshaniswa nge-tribalism ngakho njengebandla sizaqala ukuxoxisana lomphakathi sizama ukubabonisa ukuthi ukuzondana ngemihlobo akulunganga.’’
Ohlaziya ngezombusazwe, uMnu. Butler Tambo, uthi udaba lokubandlululana kanye lokuxabana ngemihlobo luyingozi kodwa abantu kumele bananzelele ukuthi leli lithumba eselidale ukufuthelana okwesikhathi eside uzulu wakoBulawayo ekhonona ngokunengi okugoqela umbhuqazwe weGukurahundi kanye lokuswela imsebenzi.
“Lokhu kumele kukhangelwe ngelihlo elibanzi kunanzelelwe ukuthi abantu koBulawayo sebelesikhathi bekhonona ngombhuqazwe weGukurahundi kanye lesimo somnotho esesibangele ukusweleka kwemisebenzi. Ngakho-ke ukumisa umuntu onjengoDube umsebenzi ngaloluya uhlobo kubangela ukuzonda.”
UMnu. Mbuso Fuzwayo owenhlanganiso yeBhetshu Likazulu uthi lokhu kufuthelana kungabe kubangelwa yikuthi abantu bakoBulawayo bazizwa bedelelekile kakhulu endaweni yabo yomdeni.
UMnu. Mike Ndiweni, umqondisi wenhlanganiso yabaphila ngokuthengisa eyeBulawayo Vendors Trust, usola umsekeli kameya ngakwenzileyo.
“Udaba lukamnunzana Kambarami lukhanya lulobunzima nxa sikhangele impikiswano eyenziwe emthethwandaba kukhanya engani engabe lawo umlandu awetheswayo nxa silalele amagqwetha amele iMthwakazi movement. Sinanzelela ukuthi amaqhwetha akhe akazange afune ukungena kundikimba yendaba basebenzisa i-technicality ukuthi engxenye umthethwandaba weHigh Court awula lungelo lokukuthi ubambe udaba lolu. Ngokubona kwami kukhombisa ukuthi enxenye umzalwane waba ngumsekeli kasodolobho okungekho emthethweni.”
Ingxabano le iqhamuke ngemva kokuba umsekeli kameya wakoBulawayo emise umsebenzi umabhalane wedolobho lakoBulawayo emethesa umlandu wokwehluleka umsebenzi kanye lenkohlakalo.
Imizamo yokuxhumana lohlangothi lwezokukhumisana umlotha olwe National Peace and Reconciliation Commission kanye laye uKambarami yehlule.
Kodwa ekukhulumeni kwakhe leStudio 7 ngeviki edluleyo, uKambarami uthe uTown Clerk uDube utholakale ephatheka kwezenkohlakalo, njalo nguye obangele udubo lwamanzi kuleli dolobho.
