UMongameli Emmerson Mnangagwa usekhuthaze uzulu weZimbabwe ukuba atshiye umkhuba wokutshengisela ngesikhathi seLockdown esithi lokhu kufaka uzulu engozini.
Lokhu ukutsho emathuneni aweNational Heroes Acre, eHarare ngesikhathi kungcwatshwa umuyi uAbsolom Sikhosana, awayengumgcinisihlalo weZANU PF koBulawayo obhubhe ngeviki ephelileyo.
Bekuhlatshelwa embuthanweni wabantu abalihlekana eNational Heroes Acre kubekwa uSikhosana, ophiwe inhlonipho yeqhawe lesizwe. USikhosana waba nguholi wabatsha kuhlangothi lwebandla leZANU PF okwesikhathi eside njalo wayevame ukutolika iSiNdebele nxa owayengu mongameli uRobert Mugabe loMnangagwa bekhuluma lozulu eMatebeleland.
Ekhuluma kulumngcwabo, uMnangagwa usole umkhuba wokutshengisela, okungamazwi acatshengelwa ukuba abeqondiswe kwabatsha abeMDC Alliance, abatshengisele eWarren Park eHarare ngeviki ephelileyo abanye babo bacina sebethunjiwe batshaywa kabuhlungu.
“Kasihlaleni sibambene, sigcine ukuthula esilakho. Akumelanga sifake impilo zabantu engozini, ngokutshengisela okungekho emthethweni okwenzelwa ukukhukhumeza abakukwezombusazwe. Singabantu banye, abantu belizwe linye ilizwe le Zimbabwe.”
Okumangalise abanengi yikuba umbuthano lo ube ulabantu abanengi abangedlula ikhulu kulalokhu okuvunyelwa ngumthetho ngesikhathi selockdown, othi abantu kumele bangadluli amatshumi amahlanu nxa bebuthana emfeni.
Ephendula amazwi kaMnangagwa, isikhulumeli sikaMnu. Nelson Chamisa, umkhokheli weMDC Alliance, uMnu Nkululeko Sibanda, uthe akumelanga asebenzise isikhathi selockdown ukwephula amalungelo oluntu.
“UMnu. Mnangagwa ukhuluma nge coronavirus engani uyayiqakathekisa. Sibona ukuthi emfeni leyi bekugcwele abantu. Okufanele sikukhangelisise yikuthi uMnu. Mnangagwa usebenzisa ingatsha zikahulumende ukuqila abantu, ephazamisa izixwayiso zecoronavirus prevention.”
Kodwa isikhulumeli senhlanganiso yomanyano wenhlanganiso ezizimeleyo eyeCrisis in Zimbabwe Coaltion, uMnu Marvelous Khumalo, usekela okutshiyo nguMongameli.
“Siyavumelana lalokhu okutshiwo ngumongameli ukuba abantu bame ukutshengisela. Siyakwamukela lokhu kodwa sicela uhulumende ukuthi kufuze abone ukuthi amalungelo abantu kawahlukuluzwa kusikhathi lesi sokutshengisela ukuze bengafaki impilo yomuntu wonke engozini.”
Isakhamuzi seHarare, uMnu Pride Mkono, uthi ubekhangelele ukuthi umongameli atsho ukuba labo abathumba uNkosazana Joana Mamombe labanye bakhe abeMDC bazakwenziwani.
“Uzulu ubekhangelele ukuthi umongameli uzakhuluma ngokuthunjwa kuka Mamombe nagbantu abacatshangelwa ukuthi zinsoli. Ukungakhulumi kwakhe kutshengisa ukuthi kalandaba alamalungelo abantu. Besikhangele ukuthi uzakhuluma ngosizo aluthembisa abantu ngoba abantu besifa ngendlala”
UMnangagwa ulandise ngembali ka muyi esithi wayengumuntu owayezimisele ukusebenzela ilizwe lebandla lakhe leZANU PF.
USikhosana, obhubhe esele minyaka engamatshumi ayisikombisa lanye, waqala ngokulwela amalungelo ezisebenzi phansi kwenhlanganiso yeRhodesia Clothing and Government Workers Union, andubana angene kwezombangazwe ngomnyaka ka1970 ekubandla leZAPU. Kuthe ngomnyaka ka1977 waya eZambia lapho ayafundela ukuba ngumlweli wenkululeko engaphansi kweviyo leZPRA.
Umuyi waba ngumholi wabatsha kubandla leZanu PF okwesikhathi eside njalo ubhubhe esengumgcinisihlalo walelibandla koBulawayo.
