Izakhamizi zeMatopo ezansi yeMandebeleni kanye lezakoBulawayo zibhaxhabulwe kakubi ngamapholisa lapho ziye emkhosini wokucela izulu eAmakhosi koBulawayo.
Phezu kokubhaxhabulwa kakubi kwabanengi kusehlakalo lesi uMnu. Stanley Raphael Khumalo kunye labanye abalitshumi lanye babotshiwe baze wakhululwa izolo emini ngemva kokuba umthethwandaba ulahlele khatshana icala abekade eletheswa. Laloba kunjalo abatshayiweyo bebelokhe bethoba imvimvinya ezinqeni, embaleni kunye lezandleni.
Induna yako Bulawayo uMnu. Mkhize Khabazela uthe inkosi ibotshelwe ukuba liNdebele lokwenza into elisiko layo.
UNkosikazi Sithokozile Ndlovu omunye wabakade bebotshiwe uthe ukutshaywa lokubotshwa kwabo kumzwisa ubuhlungu njalo isiphatho abasiphiwe ngamapholisa lomumo welizwe sokumenze waba yintandane.
UMnu. Vuyo Mnguni uthe babotshwe besiyakhulekela izulu lenhlanyelo yabo.
Umkhokheli webandla leMthwakazi Republic Party, uMnu. Mqondisi Moyo, obekade esemthethwandaba ngoMvulo uthe abantu bakoMthwakazi bayahlukunyezwa kakhulu lokubandlululwa.
Imbuthano yabalandeli beNkosi uKhumalo ihlala ivinjwe ngamapholisa. Umkhosi wokugcotshwa kwakhe wavinjwa wamiswa ngamapholisa ngoba ebikwa engemukelekanga njengenkosi.
Isimanga abalandeli bakhe bathi uhulumende weZimbabwe lenhlanganiso yeMthwakazi Cultural Association bakhanya bemukela lokuhlonipha uMnu. Bulelani Khumalo owase South Africa njengenkosi.
