Izifundi zemakolitshi eZimbabwe zithi kumele inkantolo ikhulule uTakudzwa Ngadziore, umkhokheli wenhlanganiso yeZimbabwe National Students Union (ZINASU), owabotshwa etshengisela phandle kwenkampani okucatshangelwa ukuthi yasetshenziwa ngamapholisa ensitha athumba uTawanda Muchehiwa.
Amalunga enhlanganiso le ethule incwadi ejulileyo emawofisini enkantolo eseTredgold Building koBulawayo esithi uNgadziore kalacala njalo sokumele alobe imihloliso yakhe.
UNgadziore ubotshwe ngenyanga edluleyo kaMpandula etshengisela phambi kwamawofisi enkampani yezimotha eyeMpala Car Rental labanye bakhe befuna ukuthi inkampani le iveze ukuthi ngobani abahlawulela imota eyasetshenziswa ukuthumba elinye lamalunga eZINASU, uTawanda Muchehiwa.
UJingani Shoko, unobhala weZINASU, uthi iyadanisa indlela okuphethwe ngayo icala lika Ngadziore.
UNgonidzashe Nkomo, ofunda eLupane State University, uthi bafisa ukuthi kulungiswe udaba lolu ngokutshetsha ukwenzela ikusasa kaNgadziore labanye.
Kasenelisanda ukukhuluma ngodaba lolu lomphathintambo obona ngokwahlulelwa kwamacala, uMnu. Ziyambi Ziyambi, ubengaphenduli ucingo lwakhe.
Umahluli wedale leHigh Court, uJustice Davison Foroma, ubike ngeviki ephelileyo ukuthi usamile kancane ukwethula isinqumo sodaba luka Ngadziore, ofisa ukuthi aphiwe isibambiso sebail.
