Kuhlelo lwamasiko lokuphila kwabantu, ngoLwesibili siqhubekele phambili ngodaba lokusoka kulandela umbiko othi uyasila kancance ujaha osanda kuhlinzwa esibhedlela seParirenyatwa eHarare kulandela ukubhibhidla kwenxeba lokusoka.
Ubesebuhlungwini obubi ujaha lo weSaint Johns Primary School eBuhera, esabelweni seManicaland, lapho ehanjiswa khona esibhedlela.
Okwamanje uhlala lomalumakhe eNyazura lapho ahanjiswa esibhedlela kabili ngeviki. Ukubhibhidla kwesilonda sokusokwa kubuya ngesikhathi idale lephalamende leZimbabwe lihlafuna udaba lokusoka abantwana bebancane.
Akhona amalunga edale leli athi akumiswe ukusoka abantwana kodwa amanye athi kumele kuqhubekele phambili ngaphansi kohlelo lokusoka olwasungulwa nguhulumende ngomnyaka ka2009 ilizwe lizama ukumisa ukumemetheka kwegcikwane lengculaza eleHIV.
Siyaqhubeka ngodaba lokusoka abantwana lo Nkosikazi Sherley Kapuyanyika Matundu loDokotela oyisiphathamandla kubutho lesizwe uLieutenant Colonel Israel Dube, abaxoxa loGibbs Dube weStudio 7.