Ukuswelakala kwemali kanye lokuqonga kwentengo yempahla lokudla ezitolo sokusenza abantu bethenge okuqakatheke empilweni okugoqela itshukela, impuphu lokunye okutshiyeneyo.
Lokhu kwenzakala ngesikhathi imali yohlobo lwama bond notes lungatholakali.
Abantu abenengi sebetshona bedinga ukudla kulokutshi benze okunye okubaphilisayo.
Intengo yamafutha ezimota kanye leyetshukela ikhuphulwe ngoLwesibili yinkampani yeZimbabwe Energy Regulatory Authority. Intengo yetshukela ikhuphuke isuka kumadola ayisitshiyagalombili yayafika phose kumadola angamatshumi amabili i$17.22, kuthi intengo yepethulo isuke ku$7,47 yayafika ku$7.55 kusilinganiso seliter.
Ngalokho, uMnu. Effort Ncube ongumcebisi wenhlanganiso emele amalungelo kazulu iNational Consumer Rights Association, uthi ukukhuphuka kwentengo yinto engamulelekanga kwele Zimbabwe.
“Ukudula kwezinto kulokhe kusenzakala kusiyaphezulu kukhwela izinto kukhwela amafutha ezimota, kukhwela i-electricity kukhwela itshukela lakho konke okuphilisa abantu yinto engamulelekanga ngitsho lakancane phakathi kwabantu beZimbabwe thina abathengi. Sithi uhulumende lawo wonke amankampani kumele basebenze ngendlela ebanzi ukuthi babone ukuthi bayayilungisa yonaleyo into ngokuba nxa ingalungiswanga izaqeda ukuthula phakathi kwelizwe ngoba indlala engaka lobunzima obungaka abusoze bamuleke elizweni.”
Abanye osomabhizimusi abanjengo Mnu. Nhlanhla Ncube bathi ukusilela kwemali sekubulala ibhizimusi ngoba imali layo isithengiswa.
‘‘I cash these days ayitholakali uyakwanisa ukuthi into yakhona ofuna ukuyenza okuyibusiness okwenzayo iyabe ifuna ukuthi uthenge usebenzisa icash kodwa abantu bonke bayabe bebuya leEcocash kuyabe kunzima ngoba into wena nxa ususiya woda icash uyabe usuyithenga nge40% ungaze uhambe ebank bayakunika ismall amount of cash .’’
UNkosikazi Siphiwe Ndiweni, isakhamuzi sakoBulawayo, uthi sebethenga betatazela osokusenza angani abantu ngamasela ngendlela abathenga ngayo.
Esinye njalo isakhamuzi sakoBulawayo, uNkosikazi Thandeka Ndebele, ukhala ngokuthi umumo womnotho eZimbabwe uqhubeka usiba mubi.
“Thina sesithwele nzima lapha eZimbabwe akulanto elungayo nanko izinto ziyakhwela, kwakuthwe izinto zizakwehla ngoJuly kodwa ngibona umuntu owakhuluma ukutni zizakwehla wayezama ukuthi ziyakhwela. Khathesi nxa sithenga itshukela nge17,50 (Zimbabwe dollar) … Kambe shuwa $20. Kanti kasizweli kanti ubaba lowu okhona abone ukuthi sithwele nzima okunganani.”
Uzulu wakoBulawayo uveze ukukhathazeka ngomumo okhona elizweni esithi lokhu kuzakwenza kungabi lokuzinza kwezombusazwe lakunhlalakahle kazulu.
Abakhulume lomsakazo weStudio 7 bathi lokhu kuzadala ukuthi ubugebengu bukhuphuke ngoba abantu bayacina bephatheka emisebenzini yokuganga ukuze benelise ukuziphilisa.
