Abalandeli bebandla leZanu PF batshengisele ezitaladini izolo langoLwesithathu ekuseni edolobheni leMasvingo besithi bafuna ukuthi ezinye iziphathamandla zebandla leli zitshiye izikhundla ngesiphangiphangi.
Abalandeli laba abasekela icele leZanu PF elicatshangelwa ukuthi likhokhelwa nguMnu. Emmerson Mnangagwa kade befuna ukuthi iziphathamandla zaleli bandla uMnu. Dzikamai Mavhaire loMnu. Kudakwashe Basikiti batshiye umsebenzi njengoba becatshangelwa ukuthi bafuna ukugenqula uMongameli Robert Mugabe.
Imbiko esiyitholileyo itshengisa ukuthi kube lokugijimisana phakathi kwabalandeli abalembono etshiyeneyo abagoqela abasekela uNkosikazi Joice Mujuru ocatshangelwa ukuthi ukhokhela elinye icele le Zanu PF elifuna ukuthola izikhundla eziphezulu emhlanganweni webandla leli ozayo oweCongress ngoMpalakazi lonyaka.
Abatshengisele ngoLwesithathu ekuseni babikwa benze lokhu emawofisini kaBhasikiti ongumphathintambo wesabelo seMasvingo. Kasenelisanga ukukhuluma loMavhaire loBhasikiti ngodaba lolu.
Sokuxotshwe abagcinizihlalo abayisitshiyagalo lunye kubandla leli ngesikhathi kulungiselelwa umhlangano wePolitburo ozakwenziwa ngoMgqibelo.
Umhlangano lo ukhangelelwe ukwethula izinqumo zokuthi kuguqulwe isisekelo sebandla leli ukuze uMongameli Mugabe athole amandla okukhetha abantu abafunayo ezikhundleni zomsekeli kamongameli.
Ibandla leli selikhangelelwe ukwenza ukhetho lukamongameli kuphela kuthi-ke abanye bakhethwe nguMugabe.
Konke okwenzakala kubandla leli kukhanya sokudidanise ingqondo yabaphakathi labaphandle kwelizwe abathi kuyenzakala ukuthi kube lobudlwangudlwangu eZimbabwe obubangelwa yingxabangxoza ekuZanu PF.
Omunye walabo abacabanga njalo nguMnu. George Mkhwananzi oyingcwethi kwezombusazwe otshele uGibbs Dube weStudio 7 ukuthi kuyethusa okwenzakala kubandla leli.