Kuhlelo lwamasiko lokuphila kwabantu nsukuzonke, liviki sixoxa ngemidlalo eyenziwa ngabantu abadala abagqoka izembatho zabantwana besikolo leyabasakhulayo ebizwa kuthiwa ngama vuzum njalo lalokho okwakubizwa kuthiwa ngama tea parties.
Sokuyinhlalayenze koBulawayo ukubona omama labobaba begqoke baphelela izembatho zabantwana besikolo besiyabuhlaba utshwala nje santando ezindlini zabangane baze bayelemacansini lezithandani zabo zalelolanga.
Lokhu kuhambelana lokwenziwa ngabasakhulayo abangena imidlalo yevuzum lapho ababhema khona insango, banathe utshwala bazebaye lemacansini kungakhethile ukuthi benza lokhu lobani.
Izolo bekulemidlalo yama tea parties ekade ikhuthaza ukuncintisana kuzulu lokwakhana ngendlela ezitshiyeneyo.
Bekungajayelekanga ukuthi abasemidlalweni le baye emacansini santando njalo benze okunye okwenziwa ensitha.
Kambe sokutheni abadala labasakhulayo sebelahleka kangaka emidlalweni yabo kulezi insuku?
Ukuze sihlaziye udaba lolu, sixoxa loNkosikazi Sheilla Nkomo Musonda ingcwethi kwezamasiko esintu njalo ongukhansila koBulawayo loMnu. Thandeko Zinti Mnkandla oyingcwethi kwezamasiko esintu
UMaNkomo uthe kazange angene imidlalo yama tea parties leyama vuzum. Uthi kumele kubotshwe abantwana abangena imidlalo le njalo labazali babo.
Uphinde wathi okunye okumangalisayo yikuthi emidlalweni le lapho abadala abagqoka khona izembatho zezikolo lamapholisa ayabi kukholiswe ilanga lizwe liyephuma.
Kasenelisanga ukukhulumisana lamapholisa ngalokho okwenzakala emidlalweni le njengoba kade bengabambeki kumakhalekhukhwini.
