Abantu abasekela uNdiweni, osanda kususwa nguMongameli Emmerson Mnangagwa esikhundleni sokuba yinduna yesiqintini seNtabazinduna, sebebumbe isikhwama semali ebulenjini beInternet enkundleni yeGofundme.
Sokubuthaniswe imali edlula inkulungwane ezintathu lengxenye - $3,700 phakathi kwamahola angamatshumi amabili lasithupha.
UMnu. Nkululeko Mbonisi Fuyane, obumbe isikhwama lesi esiqhutshwa ngaphansi kwesihloko esithi #ISupportChiefNdiweni, uthi kuyathokozisa ukubona abantu abanengi befaka imali esikhwameni lesi esisungulwe izolo.
Banengi njalo abasekela uNdiweni ngendlela ezitshiyeneyo okugoqela abanye ezabelweni zeMatabeleland leNkabazwe asebedinga impahla lokudla kokunika umdeni wenduna eyaziwa ngokuthi yinduna yabantu. Kukhanya bebanengi kakhulu abathakazelela uNdiweni ngenxa yokuthi bathi ulwela ilungelo labantu bonke eZimbabwe.
Umdeni wakhe uzonde okumangalisayo ngokwenziwe nguhulumende kaMnangagwa obambisane lezinye induna bamsusa esikhundleni.
UMnu. Wilson Bancinyane Ndiweni, isikhulumeli somdeni kaFelix Nhlanhlayamangwe Ndiweni, uthi kabavumelani lokwenziwe nguhulumende. Uchaza indlela abazaphatha ngayo udaba lolu.
UNdiweni ugcizelele esithi bazahlala phansi bakhulume ngokususwa kwendodana yabo esikhundleni.
UMnu. Thomas Sithole, olwela ilungelo likazulu uthi uzulu uzonde okumangalisayo ngokwenziwe nguhulumende.
UMnu. Cosmos Mafu, isakhamuzi sakoBulawayo, laye uzonde okumangalisayo ngodaba lolu.
Abasekela ibandla leZanu PF bathi sokumele uNdiweni angene ezombangazwe. UMnu. Believe Gaule webandla leli ngomunye wabalombono lo.
Asenelisanga ukukhuluma ngodaba lolu loMnu. July Moyo, umphathintambo wezabelo lamadolobho obengaphenduli umakhalekhukhwini wakhe. Uhulumende uthi kulabanye abomdeni kaNdiweni abafuna umnewabo kaNdiweni, uJoram Ndiweni ohlala eBhilithane, angene esikhundleni senduna eNtabazinduna.
Kodwa umdeni kaNdiweni uthi umuyi uKhayisa Ndiweni wathatha isinqumo sokuthi uFelix Nhlanhlayamangwe Ndiweni engene esikhundleni sakhe ngoba wathi ukhaliphile.
