Isimo ezibhedlela zikahulumende siqhubeka sisiba sibi ngamandla ngenxa yokukhalala umsebenzi okwenziwa ngodokotela abasanda kugqiba izifundo abafuna iholo likhutshulwe kanye lokuthi izibhedlela zithole konke okokusebenzisa.
UDokotela Tawanda Zvakada, unobhala wenhlanganiso yabodokotela eyeZimbabwe Hospital Doctors’ Association, uthi akusesebenzeki ezibhedlela.
”Izibhedlela zisesimeni esibi kakhulu. Odokotela bonke sebekhalele umsebenzi kuthi amaSenior doctors lawo abelokhe eselapha abantu abaphatheke kakhulu sebenikeze uhulumende i48hrs ukuthi alungisise izikhalazo zabodokotela. Nxa engehluleka labo bazakhalala umsebenzi okuzakwenza ukuthi odokotela bonke bazihlalele ngekhaya. Thina siyafuna ukubuyela emsebenzini kodwa okwakhathesi siyehluleka ukuzithengela ukudla kanye lokuzihambisa emsebenzini. Ngakho-ke sikhangelele ukuthi uhulumende alungisise udaba lolu masinya.”
Abantu abake bahamba ezibhedlena ngoLwesibili besiyakwelatshwa kumbe bephelekezela izihlobo lezinini, bathi bathole abanye odokotela besebenza.
UNkosikazi Nomusa Phiri, omunye ohambe esibhedlela ehamba lesigulane, uthi udokotela kade besebenza ngesikhathi ekuleyo ndawo.
“Mina ngike ngahamba esibhedlela. Amadokotela ebekhona. Ubuwabona ebhodabhoda. Lapha ebengikhona kumbe bekuyikuthi yi-ward yezigulane ebezihlinzwa. Bengilesigulane khonangale esikhangelwe ngudokotela omkhulu. Akula lutho olubi engingathi ngiyalusola, mina uncedo ngikwanisile ukuluthola, ngike ngatshelwa ukuthi ngizofika ekuseni ngizobonana lodokotela ngenelisa ukumbona wangichasisela ngecondition yomuntu wami ebengihamba laye.”
Omunye wezigulane, uNkosikazi Sihle Dlodlo, laye ufakaza ukuthi ulutholile usizo lokuhlolwa ngodokotela.
“Mina ngihambile eMpilo ngisiya hlolwa i-operation yami. Odokotela ngibatholile sibili sebeqalile ukusebenza. Siyabonga ukuthi sebephendukile emsebenzini ngoba singafa bengekho. Siyacela ukuthi bangakhalali umsebenzi ngoba kunzima nxa siphathekile siyahlolwa ngubani, singacina sisifa. Sicela ukuthi uhulumende akhangele izikhalazo zabodokotela ukwenzela ukuthi odokotela bangahlali bekhalala umsebenzi njengoba kuyibo abaphethe impilo zabantu, kabazamele lokhu abakufunayo zikhathi zonke.”
UMnu. Cebo Ndlovu, omunye wabakade betshitsha esibhedlela ukuzebona umnewabo olaliswe eUnited Bulawayo Hospitals, uthi akumelanga odokotela bakhalale umsebenzi.
“Mina bengitshitsha eUBH, umnawami ubekhonale, usizo silutholile odokotela bebekhona singazi kumbe uhulumende ubangezelele iholo kumbe yikuthi omunye wabo owaye nyamalele setholakele. Kodwa silovalo ngoba sizwe ihunga hunga lokuthi sebenga striker futhi. Besicela ukuthi uhulumende angenele mansinya.”
