Abalwisana lokumemetheka kwegcikwane lengculaza bathi abaphila legcikwane leli bakhala ngenhlawulo yezibhedlela lamakilinika eyenza ukuthi bengelatshwa ngemfanelo.
USenator Mildred Reason Dube, ngomunye wabakhala ngohlupho lolu.
“Umkhuhlane lokhe umemetheka imfundiso ibancane. Abantu kabelatshwe kungelambadalo ezibhedlela. Sifuna imali abayihlawula ezibhedlela yesulwe njalo sifuna uhulumende anakekele abantwana balababantu kunye labantwana asebesele begcine imizi.”
Lokhu kusekelwe nguSenator Helen Zivira, othi idale lephalamende lihlolosisa udaba lokuhlawuliswa kwabaphila legcikwane lengculaza.
Isakhamuzi sakoBulawayo, uNkosikazi Sibongubuhle Sibanda, uthi uhulumende kumele abone ukuthi abantu abagula imikhuhlane etshiyeneyo kabahlawuliswa lutho ezibhedlela lemakilinika.
“Abantu abagula imikhuhlane abaphila layo kumele bayelatshwe kungelambadalo ngoba isikhathi esinengi bacina behlala emakhaya ngexa yokuswela imali yokuhlawula ukuze belatshwe. Ngibona kuhlelekile ukuba uhulumende ahlale ehlelile imali yokuhlawulela lababantu ezibhedlela ukuze kungabi lodubo lwabantu abayehluleka ukuthola ukwelatshwa ngoba bengelamali yokuhlawula esibhedlela.
Inhlanganiso yeNational Aids Council isanda kwenza umkhosi wokunanza usuku lwe World AIDS Day koBulawayo obelulesihloko esithi ‘Get tested, My Status, My Health My Life’.
UMqondisi weNational AIDS Council koBulawayo, uNkosikazi Senatra Nyathi, uthi idolobho lakoBulawayo kumele lilwisane kakhulu lokumemetheka kwegcikwane lengculaza.
“Sifuna ukuba koBulawayo sehlise inani legcikwane leHIV lababamba lumkhuhlane. Sikhuthaza abantu ukuba bayehlolwa eminye imikhuhlane ngoba sesinanzelele ukuba abantu abasabulawa yingculaza kodwa eminye imikhuhlane isibangela ukuba abantu bafe.’’
Uthi abantu kumele behlolwe igazi ukwenzela ukuthi babekwazi isimo sabo.
“Sikhuthaza abantu ukuba bayehlolwa, bayelatshwe njalo bakhulume ngawo lumkhuhlane ukuba bawenqabele. Udubo olukhona yikuba inani labantu abalomkhuhlane lo liphezulu koBulawayo njalo lenani labantu ababamba lumkhuhlane liya liqansa okuzakwenza ukuba imizamo yethu yokulwisana lalo umkhuhlane ingafezwa.”
Abantu abaphila legcikwane lengculaza bathola amaphilisi okwehlisa igcikwane emzimbeni kungelambadalo lobanje behlawuliswa ukwelatshwa eminye imikhuhlane elakho ukukhulela umzimba. lsikhathi esinengi bayehluleka ukuyakwelatshwa ngoba bengela mali yokuhlawula ezibhedlela.
