Ibandla lezombusazwe elibunjwe lonyaka eleZimbabwe First elikhokhelwa nguMnu. Maxwell Shumba lithi lizimisele ukuguqula konke okwenzakala eZimbabwe loba nje kusakhatshana ukuthi ibandla elibusayo liphume embusweni.
Omunye wabaqondisi bebandla leli obona ngezabesifazane, uNkosazana Thabisile Ncube, uthi njengoba iZimFirst iqakathekisa intando kazulu izazama ngawo wonke amandla elawo ukuthi ingene kuzulu ukuthi izwe ukuthi abantu makhaza bathini ngesimo selizwe.
"Simele abantu beZimbabwe. Siyabona ukuthi umnotho welizwe sowadilika kodwa sizimisele ukuthi sisebenzele uzulu."
Uthi okwamanje ibandla leZanu PF lehluleka loba nje lalizama ukwenza okufunwa nguzulu.
Uthi ibandla lakhe lifuna ukuthi amabandla aphikisa eleZanu PF abambane ukuze kususwe ibandla leli embusweni.
Uthe amabandla abangabambana lawo yilawo alembono efana leye ZimFirst.
"Sizimisele ukusebenza lamanye amabandla afuna ukunceda abantu beZimbabwe befaka abantu beZimbabwe kuqala.
Uphinde wathi iZimFirst izakhuthaza ukuthi kuvuselelwe amankampani amanengi ukwenzela ukuthi abantu makhaza bathole imisebenzi.
Uthe sebeqalisile ukusebenza labantu bemazweni ukwenzela ukuvuselela umnotho weZimbabwe.
Ukuze lizwe okunengi ngodaba lolu hambani kubulembu beInternet ku – www.voandebele.com.
NgoLwesithathu sixoxa loMnu. Samuel Sipepa Nkomo umsekeli kamongameli wePeople’s Democratic Party othi iZanu PF isiyehlulekile kwezombusazwe.