Ezinye ingcwethi kwezombusazwe zithi ukulwisana phakathi kwabatsha kubandla leZanu PF kulakho ukwenza ukuthi ibandla leli lidabuke phakathi.
Ingcwethi lezi zithi ukumiswa okwezikhatshana kuka Lewis Matutu, uGodfrey Tsenengamu loPupurai Togarepi ukuba kuhlangothi lwabatsha kuveza ukuba kulenkokheli elwisana ngezombangazwe kubandla leli.
Omunye wabacabangela ukuba kukhona okwenzakala kubandla leli nguMnu. Peter Manala.
Zinengi ingcwethi ezilombono lo lobanje uTsenengamu esithi okwenzakalayo yikulwisana lobukhohlakali hatshi ukubangelana izikhundla lokunye kubandla leli.
“Kungamanga ngoba abantu abanengi abenza inkohlakalo le baqala ngesikhathi sikaMai (Mrs. Joice) Mujuru, basebenza labo (Dzikamai) Mavhaire, labo (Robert) Mugabe labo Grace Mugabe. Kabalama card omhlangano. Ngamasela nje abafuna ukuba lamandla. Kabalani loMongameli Emmerson Mnangagwa loba ubaba uChiwenga”
UMnu. Jim Kunaka, owake waba kubandla leZANU PF waxotshwa esesekela uNkosikazi Joice Mujuru, owaxotshwa kubandla leli lisakhokhelwa nguMnu. Robert Mugabe wabumba ibandla lakhe, uthi ukuxokozela lokhu kuveza ukuba kulokulwisana okumangalisayo kubandla leli.”
“Kuyaliwa kuZANU PF. Kuyazikhanyela nje, kusegcekeni. Inkokheli zethu ziyasehlukanisa ukuze bayale bebusa baze bakhule. Yinto yakudala le. Kulama faction amabili kuZANU PF. Abantu bayaxotshwa kungalandelwa imithetho.”
Kodwa omele ugatsha lwabatsha koBulawayo, uMnu. Munashe Mtutsa, uthi ibandla leli liqine saka.
“IZANU PF libandla elilokubambana okukhona. Esikuzwayo ukuba kulokulwa sikubala kumaphephandaba. Thina kuZANU PF silenhloso yokubambanisa ilizwe. Lokhu esikuzwayo sikuzwa ngabantu abangekho kubandla.”
Inkokheli yebandla leZanu PF, egoqela uMongameli Emmerson Mnangagwa, uRetired General Constantino Chiwenga loMnu. Kembo Mohadi, ithi badonsa ndawonye.
