Inhlanganiso yomanyano wamazwe abensundu eye African Union ibambisana lenhlangniso yomanyano weEuropean Union yenza uhlelo lokuphathisa abalimi labafuya inkomo.
Uhlelo lolu ngolokuthi abalimi labalezifuyo bathuthukise indlela abasebenza ngayo.
Uhlelo lolu lwethulelwe abalimi labafuya inkomo emhlanganweni ongenwe zingcitshi labalimi abakhangelane lezokufuya phansi kwenhlanganiso ye-African Union isebenzelana leEuropean Union eHarare.
Isiphathamandla sohlangothi lweResearch and Specialist Services kugatsha lwezokulima eZimbabwe, uMnu. Joseph Sikhosana, uthi lumhlangano uqakatheke kakhulu ngoba unikeza ithuba lokuthuthukisa ulwazi kwezokufuya.
Uthi kuqakathekile ukuba abalimi, ikakhulu abemaphandleni, bathuthukise ulwazi lwabo behlanganise lolwazi lwakulezinsuku emisebenzini yabo befuya inkomo abazaziyo kulokugijimela imihlobo abangayaziyo engaba ingahambelani lendawo abahleli kizo.
Abalimi kulumhlangano bakhuthazwe ukudinga ulwazi olugoqela lokusebenzisa uphawo lemitshiso yakulezinsuku ezenza ukuba kungabi lula ukuba iguqulwe ngamasela okufana leyohlobo lwama tattoo lensimbi zama chip.
UMnu. Shadreck Ncube, osebenzela eMatopos Research Station, uthi abalimi ikakhulu emaphandleni kabaqinise ukufuya inkomo zomdeni abazaziyo ngoba kungabaphathisa.
Uzulu ulakho ukuthola ulwazi ngendlela ezinhle njalo ezilula zokufuya ngazo eZimbabwe ikakhulu esibangeni sokucubungula ngezokufuya ezifana le Grasslands Research Station, eMakoholi Research Institute le Matopos Research Station.
Lumhlangano ungenwa zingcitshi labalimi abavela emazweni afana le Uganda, Lesotho, Kenya, Nigeria, Gambia, Ghana, Egypt le Zimbabwe njalo uphela ngoLwesine.
Uhulumende we Zimbabwe uthi uphakathi kwemizamo yakhe yokuthuthukisa isibaya selizwe phansi kohlelo lwakhe olwe Command Agriculture Livestock ngokusekela abafuyi ngemithi yezifuyo.
