UMongameli Emmerson Mnangagwa uthi kulokuthula okumangalisayo kwele Zimbabwe okwamanje ngesikhathi sokhetho.
Uthi abantu kumele baqhubekele phambili bekhankasela ukhetho ngokuthula.
UMnangagwa wethule lokhu ngo eRudhaka Stadium eMarondera esabelweni seMashonaland East emhlanganweni webandla leZanu PF wokukhankasela ukhetho oluzayo.
UMnangagwa uthe udlakela kalufunakali eZimbabwe.
“Kasifuni ukuthi kube lodlakela. Bazaliqala kodwa lingaphindiseli. Lingabantu abalenhlonipho njalo liyakwazi okumele likwenze. Lingethuswa ngokungamabandla lokhu okungalancedo. Sokusele amalanga amalutshwana ukuthi kubelokhetho. Kulezi insuku kulokuthula okumangalisayo eZimbabwe. Abantu bayahamba lapho abafuna ukuyakhona ngesikhathi sokukhankasela ukhetho. Thina sizingcwethi kwezombusazwe.”
UMnangagwa uthe amabandla aphikisayo achitha isikhathi elwisana leZimbabwe Electoral Commission kulokuthi akhankasele ukhetho oluzayo.
“IZEC kayisilohlangothi lukahulumende. IZEC izimele yodwa. Akulabandla okumele litshele iZEC ukuthi kumele yenzeni. IZEC kumele yenze konke ekufunayo ilandela isisekelo sombuso welizwe. Kubandla leZanu PF siyahlonipha isisekelo sombuso welizwe. Ngakho-ke ngithi akumelanga kubelodlakela ngesikhathi sokhetho oluzayo.”
Uphinde wathi uyalalela okukhulunywa ngabantu.
“Esikukhulumayo lapha yikuthi umongameli wenu ngumongameli wabantu ngoba uyalalela abantu. Umongameli ngumuntu omele abantu njalo owenza konke okufiswa ngabantu. Inkokheli yebandla leZanu PF yinkokheli yabantu. Konke okukhulunywa ngabantu yikho esikulalelayo. Abantu yibo abakhokhela ibandla leZanu PF. Ilizwi labantu lilizwi lika Nkulunkulu.”
Uthe uhulumende wakhe uzaqhubekela phambili enika abantu inkomo ukwenzela ukuthi bathuthukisa umnotho wabo.
