Uhulumende wakwele Bhilithane usesungule isikhwama ngesiphangiphangi semali yokunceda uzulu eseEmergency Disaster Fund, yokuphathisa kumonakalo wezulu lesiphepho uCyclone Idai owehlele isabelo seManicaland eZimbabwe.
Uhulumende weBhilithane uthi uhlulukelwe kakhulu njalo ukhala labantu beZimbabwe ngokulahlekelwa kwabantu abanengi kulandela izulu lesiphepho.
Lokhu kubikwe ngumphathintambo obona ngezwekazi leAfrica uNkosazana Harriet Baldwin.
“IUk ithumela umbiko ngenhliziyo ephathekileyo kakhulu kubo bonke laba abahlaselwe yicyclone etshaye eMalawi leMozambique lase Zimbabwe kuviki eliphelileyo.”
IBhilithane ithi iphuma phambili ekuphathiseni ngokudla, lemithi, lalokhu okokuhluza amanzi ukuze ahlanzeke. Ithi njalo izakuba khonale iphathisana ixoxisana labantu ngalesisiga esitshiye izilonda”.
UNkosazana Balwin uthi, “Ikhomiti yengozi ezifana lalezi eUK isifake umkhankaso wokudinga uncedo lwemali njalo ihulumende yase UK ithe izakwengeza phezu kwalokho okuyabe kutholakele ngesilinganiso esifanayo. Ngakho abantu bayacelwa ukuthi banike ngomusa omkhulu. Nxa ulezihlobo okhathazeke kakhulu ngazo khonale ekhaya eZimbabwe uyaziswa ukuthi uye kuMP wakho lapha ohlala khona”.
UNkosazana Baldwin ugcizelele njalo ukuthi imali yonke ezatholakala bazayinika abehlelwe ngumonakalo hatshi uhulumende weZimbabwe.
“Konke okunika inhlanganiso ebona ngezingozi zaloluhlobo kuzakuya kulabo abakudinga kakhulu. Sizakusa kucivil society organisations eziphatheke kakhulu ngokuncedisa kulokhu khonangale ezinjenge nhlanganiso ezingatholi mbadalo (charities). Asisoze langitsho sithumela lemali ngo hulumende.”
Odabuka kwele Zimbabwe, uNkosazana Lucia Dube, okhokhela umanyano wenhlanganiso zeZimbabwe kwele Bhilithane owe Zimbabwe Diaspora Focus Group, uthe kuyabukekwa okwenziwe nguhulumende weBhilithane.
“Sokube le disaster ngale eChimanimani. Bathe bazama yonke imizamo abangayenza ukuthi babone ukuthi abantu eChimanimani bayathola uncedo olungabe luyadingakala.
Uhulumende weBhilithane uthi ufuna ilizwe leZimbabwe lithuthuke kwezomnotho njalo ulesifiso sokulincedisa kungaba lenguquko kwezamalungelo abantu lezombusazwe.
