Izakhamizi zakoBulawayo zithi zikhathazekile ngokusilela kwemali emabhanga kanye lokungasebenzi kahle kohlelo lokuhlawulela indleko zabo ngomakhalekhukhwini olweEcocash ngoba ludla imali.
Abantu bathi sekubahlukumeza sekubanga ngamandla umkhuba omubi wenkohlakalo emsebenzini wemali kanye lokuthengiswa kwemali engekho emabhanga.
Inengi labantu bakoBulawayo lokhu lingenelisi ukuthola imali emabhanga, wona apha ikhulu lamadola kuphela, kuthi lemali kamakhalekhukhwini eyeEcocash ayisebenzi kahle osekutshiye inengi labantu lisebunzimeni ngesikhathi uzulu ephakathi kokulungiselela ikhefu leKhisimusi.
Usomabhizimusi, uMnu. Mathew Sibanda, uthi lokhu sekuphazamisa inhlelo zakhe zokuqhuba ibhizimusi.
UMnu. Sibanda uchaze ukuba abantu sebedinga imali ngendlela enzima kukanti uhulumende wayethembise ukuba uzaqeda udubo lokusweleka kwemali eLIzweni.
UMnu. Thomas Sithole uthi ukungasebenzi kahle kweEcocash sekumdlele imali njalo kwamdalela ubunzima.
UNkosazana Anes Tshuma uthi ukusilela kwemali emabhanga sekubaphilisa nzima.
Ngesikhathi esethula imali entsha yelizwe ngenyanga edluleyo, umphathintambo wezemali, uMnu. Mthuli Ncube, wathembisa uzulu ukuba usezakwenelisa ukuthola amakhulu amathathu amadola emabhanga njalo udubo lokusilela kwemali seluzaphela.
Abenkampani kamakhalekhukhwini eyeECONET, eyiyo elohlelo lwemali lwebulenjini bethule umbiko wokwazisa uzulu ukuba baphakathi kokulungisisa ukusebenza kuhle kwemitshina yemali yebulenjini njengoba okwamanje ingasebenzi kahle osekutshiye uzulu esedlelwe imali kuthi kwabanye uhlelo lwe Ecocash luvele lungabasebenzeli okwenza bengasafinyeleli izimali zabo ezisezambeni zikamakhalekhukhwini.
Amavinkili amanengi koBulawayo asesala ukwamukela imali ekuEcocash yebulenjini kodwa bethatha eyamabhanga.
