Ingcwethi ezibona ngezokulima lokufuya inkomo, imbuzi lezinye izifuyo langokuguquka komkhathi zithi kunengi okungenziwa ngabalimi ngesikhathi sokuswelakala kwezulu okugoqela ukuhlanyela amabele avuthwa masinyane njalo lokudingela izifuyo ukudla.
Abantu abanengi abahlala ezabelweni zeMatabeleland balahlekelwe zinkomo ezinengi kakhulu njalo behluleka ukuvuna umumbu lokunye emnyakeni embalwa edluleyo ngenxa yokoma okubaselwa yisikhudumezi somkhathi okubizwa ngeSilungu ngokuthi yiClimate Change.
Ukoma lokhu kwenza ukuthi izilimo zingavuthwa ngemfanelo kube lendlala embi lokuswelakala kotshani emadlelweni.
Ingcwethi kwezokulima ezeInternational Crops Research Institute for the Semi-Arid Tropics (ICRISAT) eMatopo Research Station, zithi kumele abalimi basebenzise indlela ezibalulekileyo ezokulima ukuze baziphandele ukudla njalo bagcine kahle izifuyo loba izulu lingani ngemfanelo.
Obona ngezokuguquka komkhathi eICRISAT, uMnu. Martin Moyo, uthi kumele kulinywe okuhambelana lokoma.
Lokhu kusekelwa nguMnu. Davison Masendeke, obona ngezokulima kuhlangothi lukahulumende olweAgricultural, Technical and Extension Services.
UMnu. Allois Sifelani Hlatshwayo, ingcwethi kwezokulondolozwa kwamadlelo eMatopo Research Station, uthi kuqakathekile ukuthi kulinywe ukudla kwezifuyo.
UHlatshwayo uthi kulokudla okutshiyeneyo okungalinyelwa izifuyo.
Kulabanye abalimi abathi kuyanceda kakhulu ukulima ukudla kwezifuyo. Omunye wabathakazelela lokhu nguMnu. Lindani Moyo, ofuya imbuzi.
UMnu. Dumisani Mbikwa Nyoni, okhokhela uhlangothi lukahulumende olubona ngezokulima enyakatho yeMaNdebeleni, uthi inhlanyelo yokudla kwenkomo itholakala eMatopo Research
Ingcwethi kwezokulima kanye labafuya imbuzi bathi izifuyo lezi zilakho ukumelana lendlala ngoba zidla lapha lalaphaya okwenza ukuthi zingakhuci amadlelo. UNkosikazi Londi Ncube, olepulazi lokufuya imbuzi eMatobo Research Station, ukhuthaza abantu emaphandleni ukuthi bafuye imbuzi.
UNkosikazi Ncube uchaza imihlobo yembuzi emelana lendlala.
Iziphathamandla zeMatobo Research Station zithi abalimi bakhululekile ukuyadinga usizo lwezifuyo endaweni le. Okwamanje inhlanganiso yeEuropean Union incedisana leACTION AID imanyane njalo lohulumende wakwele Zimbabwe baphakathi kokulimukisa abalimi ngokufuya imbuzi. Inhlelo zokufuya imbuzi seziqalile ezigabeni eziyisikhombisa.
