Amapholisa ngoLwesibili avimbe odokotela labanye ababona ngezempilakahle ukuthi batshengisela emigwaqweni bayenika amalunga edale lephalamende ugwalo oluveza izikhalazo zabo ezigoqela ukuthunjwa kuka Dokotela Peter Magombeyi kanye leholo eliphansi.
UDokotela Masimba Dean Ndoro uthi amapholisa abavimbe esithi kumele odokotela bathole invumo kubo ukuthi batshengisele emigwaqweni besiya edale lephalamende eHarare.
UDokotela Ndoro uthi amapholisa avume ukuthi kuhambe odokotela abalitshumi kuphela edale lephalamende ukuyanika amalunga edale leli ugwalo lolu.
Uthi bakhulumisana lamagqwetha abo ukuze babone abangakwenza ngodaba lolu.
Ingqwetha labodokotela laba, uMnu. Doug Coltart, uthi akukho emthethweni okwenziwe ngamapholisa avimbe amalunga enhlanganiso yabodokotela eyeZimbabwe Hospital Doctors Association abefuna ukuya ephalamende.
“Kuyadanisa ukuthi amalungelo kazulu ayephulwa. Kumhlangano esiwenzileyo sivumelene ukuthi umthetho wePOSA (Public Order and Security Act) awubambi inhlanganiso ezifana leyabodokotela. Okwesibili sithe nxa amapholisa esesabela ukuthi uhlelo lolu luzacina luqhutshwa ngabanye abantu abangayisibo odokotela, kungumlandu wamapholisa ukuthi odokotela bavikelwe kulabo bantu. Kodwa ukwalisa ukuthi batshengisele akukho emthethweni.”
Umphathintambo wezempilakahle, uMnu. Obadiah Moyo, uthi uhulumende usethethe inyathelo lokuletha odokotela bebutho abeZimbabwe Defense Forces ezibhedlela zikahulumende abazabe behlola izigulane.
UMoyo ukhuthaze odokotela ukuthi babuyele emsebenzini ngesikhathi uhulumende edinga uDokotela Magombeyi.
“Ngithanda ukukhuthaza odokotela bethu ukuthi babuyele emsebenzini ngesikhathi siding uDokotela Magombeyi. Sithakazelela usekelo esiluthola kulabo ababona ngokuvikelwa kwesizwe abasithembise ukuthi bazasincedisa ukuze odokotela bethu babuyele emsebenzini.”
Kade kuxokozela esibhedlela seParirenyatwa eHarare ngoLwesibili ngenxa yokuswelakala kwabodokotela.
UMnu. Tawex Wemhere, okade ezebona isihlobo esigxotshwe yimotha ngempelasonto, uthe kuyethusa okusesibhedlela lesi.
“Kunzima akula lutho olukhona. Akakelatshwa kusukela ngeSonto lapho angene khona esibhedlela ngemva kokugxotshwa yimota akula sizo aseke waluthola ngitsho lodokotela oseke wamelapha. Sekufuna ukuthi uhulumende ancedise.”
Esinye isakhamuzi seHarare uMnu. Brian Hove, olomntwana ogulayo osesibhedlela seParirenyatwa, uthi unyawo lomntanakhe seluze lubola esesibhedlela.
“Ngibuye ukuzebona umtanami owagxotshwa yimota. Wephulwa unyawo walinyazwa ikhanda lembambo akakelatshwa. Unyawo lwakhe selubola kungela sizo alutholayo. Sizama ukucela uncedo kodwa akula sizo esilutholayo.”
Odokotela bathi ababuyeli emsebenzini kuze kutholakale uDokotela Magombeyi owathunjwa ngoMgqibelo.
Kusenjalo, abongikazi labo sebekhalale umsebenzi besithi kuyadanisa ukuthunjwa kuka Dokotela Magombeyi.
UMnu. Anthony Majongosi, okhokhela inhlanganiso yabongi esibhedlela seUnited Bulawayo Hospitals, uthi bathethe nyathelo leli ngemva kokwenza umhlangano omkhulu.
“Sifuna omunye wethu uDokotela Peter aphenduke. Khathesi senza umhlangano sifuna aphenduke engaphenduka siyahamba emsebenzini. Okwamanje asisafuni ukuhamba emsebenzini …”
Izakhamizi zakoBulawayo zithi zithwele nzima ngokwenzakala ezibhedlela.
Omunye wezakhamuzi zakoBulawayo, uMnu. Xolani Songo, uthi kuyingozi okwenzakala ezibhedlela.
“Impilo yezigulane isengozini kakhulu kuyinto enzima kakhulu ekhangelane lelizwe ngoba nxa sikhangele kulokhu abakhona khathesi abaphethe abantu ngabafundelayo ubongikazi, okutsho ukuthi bona bayenelisa kakhulu ekwamukeleni izigulane bezihambise kungcwethi ezaziyo ukuthi zingaphatha njani lezo zigulane kusiya ngokuthi ziphatheke ngani emzimbeni.
“Okwamanje sekumele zikhangele ngakho-ke kuyingozi kakhulu ngoba abakabi lalo ulwazi ebantwini laba abafunda kakhulu kibo yibo abangekho esibhedlela ukuthi bababonise indlela lokuthi kwenziweni.”
Uqhubeke ethi kuyadingeka ukuthi ingxabangxoza esezibhedlela ilungisiswe masinyane.
UNkosikazi Nancy Ncube obeyedinga usizo esibhedlela uthi uhulumende ngabe uyabazwela ngoba bathwele nzima
Udokotela Solwayo Ngwenya umqondisi wesibhedlela seMpilo wale ukuphendula imibuzo yeStudio 7 esithi isimo esikhona okwamanje sesiyingozi, ngemva kokunyamalala kuka Dokotela Magombeyi.
Uhulumende useveze ukuba uzaletha odokotela bebutho ezibhedlela ukuze bazoncedisa izigulane.
