Izigulane ziyaxotshwa ezibhedlela eMpilo leBulawayo United Hospitals lapho okulamadokotela akhalala umsebenzi.
Indawo ezifikela izifulange ezibhedlela lezi bekutshaya umoya.
UNkosikazi Lilian Nyathi obevelela eHwange elethe umntwana esibhedlela uyalandisa ngabhekane lakho.
“Ngihlangane lobunzima bokuthi ngigulelwa ngumtwana kutholakale ukuthi odokotela abakhulu abakho, uhlupho yikuthi bayastrika. So, sengizabuyela futhi eHwange umntwana engatholanga itreatment akade eyilandile. Asikwazi ukuthi bayaze bebuye nini kumbe next year. Kufuze ukuthi ngibengisizwa ukuthi sebekhona yini kumbe bayabuya.”
UNkosikazi Nyathi uqhubekele phambili esithi uzabuya nxa amadokotela esekhona eMpilo.
“Ngizabuya nxa ngingathola ukuthi amadokotela asekhona, khathesi ukhangelwe ngomunye kumbe ngudokotela omncane, kodwa okumele benze umsebenzi akula.”
Amadokotela akhalale umsebenzi ngoMqibelo esithi afuna ukuthi aholiswe amadola njalo uhulumende athenge konke okufunakalayo ezibhedlela lokunye okumbalwa.
Amadokotela la athi kawabuyeli emsebenzini uhulumende aze alungise konke abakufunayo.
Lokhu sokukhahlameza izigulane.
UMnu. Mduduzi Mahlangu uthi ufike ekuseni kusakhulunywa lamanesi njalo bahle batshelwa ukuthi amadokotela awakho. Utshelwe ukuthi abuyele ngekhaya.
“Lamhla ekuseni bahle basitshela sisavele silindile kuOutpatients ukuthi amaDoctors avele awakho. Abanye abasema Wadini bathi sekusele abangani bayagula kakhulu kodwa abanengi sebebakhiphile. Abagula kakhulu yibi abaseleyo, thina esingani siphilile bebengasikhangeli bebekhangela abangani bayagula kakhulu.”
Esibhedlela seUBH, uNkosikazi Percy Bhebhe uthe bona bathole ezinye izigulane sezikhangelwe ngudokotela njalo ubelenhlanhla ngoba omongikazi bacine bemcelela udokotela ukuthi azobakhangela.
“Udokotela simcelelwe nguNurse, kade kukahle ngoba sithole abanengi sebencedile nguDoctor esekhangela abase Delivery Room. Omongi bamtshele ukuthi kulabanye abantu abamdingayo.”
UMnu. Gideon Moyo laye obelethe isigulane eUBH uthi amadokotela akumelanga acabange ngemali kuphela ngoba baya esikolo ukwenzela ukunceda abantu. UMoyo uthi kumele uhulumende abaxotshe njengabongikazi ngesikhathi bekhalale umsebenzi nyakenye.
“Amadokotela isimo esinje siveza ukuthi bathanda imali. Kumele basebenzele abantu. Kabalangqondo.”
Umsakazo weStudio 7 wehlulekile ukukhulumisana labamele odokotela abakhalala umsebenzi.
Ukukhalala umsebenzi lokhu kuqhubekela phambili njalo akukakhanyi ukuthi kuyangaphi ngoba lawo amadokotela elokhe esiya emisebenzini nxa bebiziwe.
Kukho konke lokhu uhulumende kazwakali ukuthi uzabenzela njani odokotela ukuze izikhalazo zabo zigcwaliseke.
