Uhulumende usenikeze omanisiphala bemadolobheni elizweni amandla okuqhubeke bebhidliza indawo lapho okusebenzela abaphila ngokuthengisa lanxa umthethwandaba waphezulu oweHigh Court wethula isinqumo sokuthi indawo lezi zingadilizwa.
Lokhu kuza ngemva kokuba ezinye inhlanganiso ezimele uzulu ohlala emadolobheni zikhweze isicelo emthethwandaba waphezulu oweHigh Court esokumisa ukudilizelwa indawo zabo zokusebenzela ngesikhathi abantu bebhekane lobunzima ngenxa yokuqhamuka komkhuhlane oweCovid 19.
Umgcinisihlalo wenhlanganiso eyahambisa amakhansili emthethwandaba eye Harare and Chitungwiza Residents Forum, uMnu. Marvelous Khumalo, uthi kuyadanisa ukuthi uhulumende lamakhansili bephula umthetho.
Lokhu kusekelwe ngomela inhlanganiso yabathengisa impahla eyeBulawayp Vendors Association, uMnu. Michael Ndiweni.
“Lokhu kutshengisa ukuba abantu abazisebenzelayo kabahlonitshwa kungaze kungenele umthethwandaba ukuthi abantu laba bahlonitshwe. Idolobho leHarare liyakuqhubeka ukuthi kabalaleli isinqumo somthethwandaba ukuba kumiswe lokhu.”
Esinye isakhamuzi seHarare, uMnu. Charles Nyoni, uthi kusobala ukuba uhulumende kalandaba labantu.
“Sonke siyakwazi ukuthi ikhansili ngeke yenza lokhu ingela hulumende. Lokhu kutshengisa ukuba uhulumende ufuna ukuba kubhidlizwe impilo zabantu. Kalani lokuthi abantu bazaphila najni.”
Kodwa isikhulumeli sedolobho leHarare, uMnu. Michael Chideme, uthi abakwenzayo kusemthethweni njalo bazanikeza uzulu indawo zokuthengisela.
Umthethwandaba weHigh Court unqume ukuba amakhansili ame ukudiliza indawo zokuthengisela ezise Chitungwiza leEpworth.
Kodwa isinqumo sikahulumende esiphume kuphephandaba leHerald silotshwe nguMnu. Zvinechimwe Churu, unobhala wogatsha lwentuthuko lezabelo, sithi amakhansili angaqhubeka ediliza izakhiwo zokuthengisela impahla etshiyeneyo.
